Astanada aqyly turaqtar ashylatyn kósheler belgili boldy
ASTANA. QazAqparat - 2019 jyldyń sońyna deıin 10 myńnan astam aqyly kólik orny paıdalanýǵa beriledi, dep habarlaıdy Elorda Info «Astananyń kólik turaǵy keńistigi» JShS baspasóz qyzmetine silteme jasap.
Elordalyq ákimdikte «Astana qalasynyń aqyly kólik turaǵy keńistigin qurý, paıdalaný jáne basqarý» jobasy boıynsha «Astana qalasynyń Kólik jáne jol-kólik ınfraqurylymyn damytý» MM men «Astananyń kólik turaǵy keńistigi» JShS arasyndaǵy memlekettik-jekeshelik áriptestik týraly ortaq shartqa qol qoıyldy.
Aıta ketken jón, bul elordanyń kóliktik ınfraqurylymyn damytý strategııasy aıasynda Astananyń kólik keńistigin basqarýǵa avtomattandyrý júıesin engizýdegi alǵashqy joba.
Memlekettik organ men jeke seriktes arasyndaǵy áriptestik elordada biryńǵaı kólik turaǵy keńistigin qurý men uıymdastyrýdy qarastyrady.
«Jobanyń biregeıligi - biz aqyly turaq naryǵyn qalyptastyrýdamyz. Qazir memlekettik áriptespen birlese, aqyly turaqqa bólingen jer ýchaskelerin rásimdeýmen aınalysyp jatyrmyz. Aıta ketetin jaıt, alǵashqy turaqtardy iske qosqaly tek 10 aıdan keıin ǵana tólemderdiń 22% kórsetkishine qol jetkizdik. Kelesi kezeńdi júzege asyrýǵa ınvestor óz qarjysyn quıatyn bolady, - dedi «Astananyń kólik turaǵy keńistigi» JShS dırektory Ardaq Turǵanqulov.
Aqyly turaqtardy iske qosýdyń kelesi kezeńi sol jaǵalaýda - D.Qonaev, Dostyq kósheleri, oń jaǵalaýda - Kenesary, Beıbitshilik, S.Seıfýllın, Jeltoqsan, Jeńis kóshelerinde júzege asyrylady.
A.Turǵanqulovtyń aıtýynsha, turaq aımaqtaryn uıymdastyryp, jol belgileri men aqparattyq taqtalardy ornalastyrýǵa belgili ýaqyt ketedi. Sondaı-aq jeke ınvestor ókili qala turǵyndaryn jol belgileri men jańa aqparattyq taqtalarǵa muqııat bolýǵa shaqyrady.
«Biz mindetti túrde bir aı buryn kólik ıelerin habardar etemiz. Aqyly turaq bolatyn jerlerge aldyn ala bul jerdiń aqyly bolatyny jaıly eskertetin aqparattyq taqtalar ilinedi», - dep atap ótti A.Turǵanqulov.
Esterińizge sala keteıik, pılottyq rejimdegi joba 2018 jyldyń 15 qańtarynan bastap Nurlyjol jelekjolynda iske qosyldy. Ákimshilik ortalyqta 487 aımaqtyń 24-i sertıfıkattalǵan arnaıy jabdyqtarmen - parkomat, jol belgileri, aqparattyq taqta jáne tańbalarmen jabdyqtalyp, aqyly boldy.
Astanadaǵy jol-kólik torabynyń alǵashqy aqyly kommýnaldyq turaq qyzmetin ótken 9 aıda 500 myńnan astam júrgizýshi paıdalanǵan, degenmen, turaq qyzmeti tóleminiń 94 myń ǵana deregi tirkelgen. Turaq erejelerin buzǵan 23 myń kólik júrgizýshisi aıyppul qaǵazdaryn aldy.
Aıta keteıik, Uly Otan soǵysynyń ardagerleri, birinshi jáne ekinshi top múgedekteri, «Altyn Qyran» jáne «Halyq Qaharmany» ordenderiniń ıegerleri, «Altyn alqa» jáne «Kúmis alqamen» marapattalǵan kóp balaly analar, Semeı ıadrolyq polıgonyndaǵy jarylystardan zardap shekkender, sondaı-aq Aýǵanstandaǵy jáne basqa da jaýyngerlik áreketter ardagerleri men múgedekterine tirkelgen avtokólikter ákimdik bekitken aqyly turaqtardy paıdalaný erejesine sáıkes, ony tegin paıdalaný quqyǵyna ıe.
Esterińizge sala keteıik, joǵaryda atalǵan azamattar jeńildikke ıe bolý quqyqtaryn tirkeý úshin jumys kúnderi saǵat 08:00-den 20:00-ge deıin Sharl de Goll kóshesi, 1a mekenjaıy boıynsha kelýi qajet. Qajet qujattar tizimi 2888.kz saıtynda kórsetilgen. Suraqtar boıynsha jumys kúnderi 8 800 080 2888 tegin telefonyna habarlasa alasyzdar.
