Astanada aqyly turaq oryndary belgilendi
ASTANA. QazAqparat - Ústimizdegi jyldyń ІІ toqsanynda «Astananyń turaq keńistigin basqarý» jobasyn engizý josparlanǵan. Qazirgi kezde ortalyq kósheler men dańǵyldarda 9 myńǵa jýyq turaq ornyn qamtıtyn 259 turaq orny belgilendi, dep habarlady qalalyq ákimdiktiń baspasóz qyzmetinen.
«Turan, Qabanbaı batyr, Saryarqa, Respýblıka, Jeńis, Bógenbaı batyr dańǵyldary men Dostyq, Áýezov, Jeltoqsan, Kenesary, Syǵanaq, Seıfýllın, Bókeıhan, Túrkistan, Beıbitshilik, Saraıshyq jáne t.b. kóshelerdegi turaqtar aqyly bolady.
«Astananyń turaq keńistigin basqarý» jobasy eki aımaqtan turatyn bolady. Birinshi aımaqqa Respýblıka dańǵyly - Bógenbaı batyr dańǵyly - Saryarqa dańǵyly- Esil ózeniniń jaǵalaýy sheginde ornalasqan turaqtar jatady. Ekinshi aımaq Orynbor - Saraıshyq - Turan - Syǵanaq kóshelerinde ornalasqan turaqtardy qamtıdy», - delingen habarlamada.
Qalalyq ákimdiktiń habarlaýynsha, turaq oryndary jetpegen jaǵdaıda kúrdeli kóp deńgeıli parkıngter salý, sondaı-aq, avtomattandyrylǵan turaqtar jasaý kózdelgen. Astananyń biryńǵaı turaq keńistigin qurý kóshe-jol jelisine túsetin júktemeni azaıtyp, jaıaý júrginshilerdiń, qoǵamdyq kólikter men avtomobılderdiń qozǵalysyn jeńildetedi.
