Astanada aqyly turaq quny saǵatyna 150 teńge mólsherinde belgilendi

ASTANA. QazAqparat - Astana qalasy Qoǵamdyq keńesiniń otyrysynda kommýnaldyq aqyly kólik turaqtary ornalasatyn oryndardy anyqtaý máselesi qaraldy. Tıisti taldaý júrgizilgennen keıin aqy tólep, kólik qoıýǵa bolatyn 259 ýchaske anyqtaldy. Olardyń shekarasy eki jolmen- jol belgilerimen jáne belgileý arqyly aıqyndaldy, dep habarlady Astana ákiminiń baspvasóz qyzmeti.

Elordalyq Jolaýshylar kóligi basqarmasynyń basshysy Edil Súleımenovtiń aıtýynsha, tehnıkalyq málimetter boıynsha 40 turaq ornyna 1 parkomattan keledi.

- Jobaǵa kiretin jabdyqtarǵa parkomattar, mobıldi qosymsha, aqparattandyrý júıesi, tetikter men tólem jasaýdy baqylaý júıesi jatady. Astana LRT kompanııasymen birge ınvestormen kelisim jasalady, bul jaǵdaıda bıýdjet qarjysy emes, tek ınvestıtsııalyq qarjy ǵana jumsalady, - dedi baıandamashy.

Atalǵan joba 2 kezeńge bólinedi, birinshi kezeńde elordanyń sol jaǵalaýynda - «Nurjol» jeleginiń, Aqmeshit pen Túrkistan kósheleriniń boıynda 910 aqyly turaq orny paıdalanýǵa beriledi. Biraq bul kezeńde Qoǵamdyq keńes músheleri men Astana qalasynyń máslıhaty depýtattarynyń eskertýlerin eskere otyryp, atalǵan ýchaskelerdegi turaqtar testilik rejımde jumys isteıdi, al júıe tehnıkalyq jaǵynan tolyǵymen synaqtan ótip bolǵan soń aqy alynatyn bolady.

Qazirgi kezde kommýnaldyq aqyly turaqtardy paıdalaný úshin tarıfti esepteý júrgizildi.

Belgilengen baǵa barlyq shyǵyndardy tolyq óteýge kepil berip, rentabeldilikti qamtamasyz etedi. Esepteýler boıynsha bir saǵat úshin tarıf 182 teńgeni quraıdy, biraq jobanyń áleýmettik mańyzdylyǵyn eskere kele, bazalyq tarıfti saǵatyna 150 teńge mólsherinde belgileý usynyldy.

«Atalǵan jobanyń maqsaty aqy alý, bıýdjetti tolyqtyrý emes, kóshe-jol jelisine túsetin júktemeni azaıtý», - dedi E. Súleımenov.

Keńes músheleri jobany jınalǵandardyń barlyq nıet-tilekterin eskere otyryp, eshbir eskertýsiz qabyldady.