Astanada aqyly kólik turaqtarynyń salyǵy 10 ese qymbattamaq

ASTANA. QazAqparat - Astanada aqyly kólik turaqtaryna salynatyn salyq bir sharshy metri úshin 19,30 teńgeden 193 teńgege deıin, ıaǵnı 10 ese qymbattaıdy, dep habarlaıdy QazAqparat Elorda ınfo saıtyna silteme jasap.

Sáýlet, qala qurylysy jáne jer qatynastary basqarmasynyń basshysy Baqtybaı Taıtalıev qalalyq máslıhat depýtattarynyń qaraýyna kólik turaqtary men parkıngter úshin bólingen jerlerge bazalyq salyq mólsherlemesin bekitý máselesin engizdi.

«Kólik turaqtarynyń kelesi kategorııalaryn ornatý usynylyp otyr: birinshi kategorııa - kólik quraldaryn aqyly negizde saqtaý qyzmetin kórsetýge arnalǵan parkıngter, ekinshi kategorııa - tegin parkıngter, úshinshi kategorııa - aıyp turaqtary. Negizgi salyq mólsherlemesin 10 ese ósirý tek birinshi sanat, ıaǵnı aqyly kólik turaqtary úshin qarastyrylyp otyr. Mólsherleme bir sharshy metr úshin 193 teńgeni quramaq. Ekinshi jáne úshinshi kategorııalar úshin salyqtyń negizgi mólsherlemesi ózgerissiz, ıaǵnı bir sharshy metr úshin 19,30 teńge kóleminde qala beredi», - dep málim etti basqarma basshysy.

Aıta keteıik, buǵan deıin salyq mólsherlemeleri 2014 jyly bekitilgen bolatyn.