Astanada aqyly avtoturaqtardyń kirisiniń tek 5% ǵana bıýdjetke túsedi – Qoǵamdyq keńes
ASTANA. QazAqparat – Elordanyń qoǵamdyq keńesi qala ákimdiginiń 2015 jylǵy 21 qazandaǵy №108-1875 «Qala aýmaǵynda kommýnaldyq aqyly avtoturaqtardy (parkıngterdi) paıdalaný qaǵıdalaryn bekitý týraly» qaýlysyna túzetýler engizilgen jobasyn maquldady, dep habarlaıdy QazAqparat tilshisi.
«Búgin sizderdiń aldaryńyzda eki máseleni kótergimiz kelip otyr. Birinshi «múgedek» ataýyn «múgedek azamat», al «múgedek balalar» ataýyn «múgedektigi bar balalar» dep ózgertý. Ekinshi, Chernobyl apatyn joıýǵa qatysqan ardagerlerden olardy azamattardyń jeńildetilgen sanattarynyń qataryna qosý týraly ótinish kelip tústi. Osy oraıda avtoturaqtardy paıdalaný erejelerine túzetý engizý kerek», - dedi Astana qalasynyń kólik jáne jol-kólik ınfraqurylymyn damytý basqarmasy basshysynyń orynbasary Erjan Dıhanbaev qoǵamdyq keńes otyrysynda.
Elordanyń qoǵamdyq keńes ókilderi aqyly avturaqtar boıynsha eskertý jasady.
«2017 jyldyń basynda «Astananyń turaq keńistigi» JShS qalada aqyly turaq keńistigin qurý, paıdalaný jáne basqarý týraly memlekettik-jekeshelik áriptestik jobasy boıynsha bastama kóterdi. Logıkalyq turǵydan alǵanda, atalǵan joba kólik quraldaryn avtoturaqqa qoıý erejelerin buzýshylar sanyn azaıtý, sondaı-aq avtoturaqtarǵa suranys joǵary jerlerde uzaq ýaqytqa qaldyratyn kólikter sanyn azaıtý bolatyn. Іs júzinde jaǵdaı kerisinshe qalyptasty. Aqyly avtoturaqtar kólik quraldaryn turaqqa qoıý erejelerin buzýǵa túrtki bolady», - dedi qoǵamdyq keńes múshesi Vasılıı Petrýşak.
Onyń aıtýynsha, balabaqshalar ornalasqan jáne basqa da avtoturaqtarǵa suranys joǵary jerlerde, parkomattar ornatylǵan bolsa kezek, kepteliske aınalady. Sonymen qatar, avturaq alańdaryn tazalaýmen ártúrli bıznes nysandarynyń qyzmetkerleri aınalysady.
Sondaı-aq, V.Petrýşak aqyly avtoturaqtar tólemderiniń 95% kompanııaǵa, tek tek 5% ǵana bıýdjetke túsetinin aıtty.
«Korporatıvtik tabys bıýdjetke tólenbeıdi. Jalpy, qala turǵyndary men kásipkerler aqyly avtoturaqtardyń yńǵaısyz ekenin aıtady. Atap aıtqanda, úılerdiń turǵyndary túski asqa kelgende, kólikterin aýlaǵa qoıa almaıdy, olar kólikti avtoturaqtarda qaldyryp, ol úshin aqsha tóleýge májbúr», - deıdi ol.
Óz kezeginde «Astananyń turaq keńistigi» JShS ókili birqatar dáıekterdi alǵa tartty. Sondaı-aq kompanııa salyqty tolyq kólemde tóleıtinetinin málimdedi.
Elordanyń aqyly avtoturaq máselesin talqylaı kele keńes músheleri túzetýler jobasyn maquldady. Sonymen qatar salaǵa qatysty máselelerdi zerdeleý úshin komıssııa quramyna kólik jáne jol-kólik ınfraqurylymyn damytý basqarmasynyń ókilin qosý usynyldy.
