Astanada aqyldy qalaǵa qatysty halyqaralyq forým-kórme ótedi
Qala ákimdigi saıtynyń habarlaýynsha, elorda ákimdigi jáne QR Aqparat jáne kommýnıkatsııalar mınıstrligi «Zerde» Ulttyq aqparattyq-kommýnıkatsııalyq holdınginiń «Astana Innovations» AQ jáne «Transtelekom» AQ-y uıymdastyrdy. Oǵan AQSh, Eýropa jáne TMD elderinen 300-den asa qonaq keledi dep kútilýde.
Forým sheńberinde Astana qalasynyń ákimi Áset Isekeshevtiń, QR Aqparat jáne kommýnıkatsııalar mınıstri Dáýren Abaevtyń, «Astana» Halyqaralyq qarjy ortalyǵynyń basqarýshysy Qaırat Kelimbetovtyń jáne smart-qalalarda qoldanylatyn aqparattyq-kommýnıkatsııalyq tehnologııalar salasyndaǵy halyqaralyq sarapshylardyń qatysýymen paneldik talqylaýlar josparlanǵan. Sarapshylardyń qatarynda City Smart Up negizin qalaýshy jáne basqarma múshesi Renato de Kastro, IDC «aqyldy qalalar» jahandyq baǵdarlamasynyń dırektory Rýgbı Klark jáne t.b. bar.
Taraptar ómir súrý sapasyn jaqsartýǵa baǵyttalǵan smart-tehnologııalardyń ınnovatsııalyq damýyna qatysty keń kólemdi máselelerdi talqylaıdy.
Halyqaralyq elderden kelgen spıkerler «aqyldy qalany» qurý kezindegi sheshimderdiń, tsıfrlaýdyń perspektıvalary týraly jobalaryn tanystyryp. Basqa da ózekti úderister týraly aıtyp beredi. Sondaı-aq, forým sheńberinde «Úndeýler, perspektıvalar jáne standarttaý» taqyrybynda aýqymdy konferentsııa ótedi.
Sharanyń qorytyndysy boıynsha yntymaqtastyq týraly 20-dan asa memorandýmǵa qol qoıý josparlanǵan.
