Astanada aqyl-esi kem 6 azamat ákimshilik jaýapqa tartylǵan
ASTANA. QazAqparat - Astana qalasynyń prokýratýrasy men quqyqtyq statıstıka jáne arnaıy esepke alý jónindegi komıtetiniń birlese júrgizgen tekserisiniń nátıjesinde áreket qabilettiligi joq tulǵalardy ákimshilik jaýapkershilikke tartý faktileri anyqtaldy. Bul týraly qalalyq prokýratýranyń baspasóz qyzmetinen habarlandy.
«Qazaqstan Respýblıkasynyń Azamattyq Kodeksiniń 26-babyna sáıkes, júıke aýrýy nemese aqyl-esiniń kemdigi saldarynan óz áreketteriniń mánin túsine almaıtyn nemese ne istegenin bilmeıtin azamatty sot áreket qabilettiligi joq dep tanýy múmkin. Sondaı-aq, Qazaqstan Respýblıkasynyń ákimshilik quqyq buzý týraly kodeksiniń 31-babyna sáıkes, ákimshilik jaýaptylyqta áreket qabilettigi joq tulǵalardy jaýapqa tartýǵa tyıym salynady. Alaıda, Astana qalasynyń Іshki ister departamentine qarasty mekemeler men Saryarqa aýdany boıynsha Salyq basqarmasy tarapynan sozylmaly psıhıkalyq syrqatqa shaldyqqan, aqyl-es kemdigi nemese psıhıkanyń ózge de syrqatty jaı-kúıi saldarynan aqyl-esi kem bolǵan 6 jeke tulǵany ákimshilik jaýaptylyqqa tartý faktileri anyqtalyp otyr», - delingen baspasóz baıanynda. Osyǵan oraı, Astana qalasynyń prokýratýrasy anyqtalǵan faktiler boıynsha zań buzýshylyqty joıý týraly usynys engizip, atalǵan mekemelerdiń qyzmetkerlerine zań túsindirý jumystary júrgizildi. Sonymen birge 6 áreket qabilettigi joq tulǵalardy zańsyz ákimshilik jaýaptylyqqa tartý týraly qaýlylardyń kúshi joıyldy.
