Astanada akvaparkke as pen sýsyn alyp kirýge shekteý qoıǵan kásipker jazalandy
ASTANA. QazAqparat - Elordada «Ailand» otbasylyq demalý ortalyǵyna antımonopolııalyq zańnamany buzýyna baılanysty aıyppul salyndy, dep habarlaıdy QazAqparat tilshisi.
«Astanada «Ailand» otbasylyq demalý ortalyǵyna qatysty antımonopolııalyq zańnamanyń buzylý jaǵdaıy tirkeldi. Tergeý qorytyndysy negizinde tutynýshylardyń quqyǵy qorǵaldy. Belgili bolǵandaı, «Ailand» otbasylyq demalý ortalyǵy demalýshylarǵa óziniń akvaparkiniń aýmaǵyna azyq-túlik pen sýsyndardy alyp kirýge shekteý qoıǵan. Osy is-áreketimen básekeni shektep, óziniń jalǵa alýshylaryna basymdyq bere otyryp, tutynýshylardyń quqyǵyn shektegen», - deıdi QR Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyǵyn qorǵaý komıtetiniń Astana qalasy boıynsha departamenti, taýar naryqtarynda monopolııaǵa qarsy zańnamanyń buzýshylyqtaryn tergep-tekserý bóliminiń basshysy Dastan Sámen.
Onyń aıtýynsha, naryqtyń sýbektisine qatysty ákimshilik quqyqbuzýshylyq isi qozǵalyp, keıin tıisti sheshim de shyqqan.
«Іs qysqartylǵan tártipte ótkizilip, naryqtyń sýbektisine 360 750 teńge kóleminde ákimshilik aıyppul salyndy. Sonymen birge, seriktestikke antımonopolııalyq zańnama normalaryn buzýdy toqtatý týraly talap qoıyldy. Osylaısha, turǵyndar burynǵydaı emes, tamaǵy men sýsynyn ákelip, akvaparkte demala alatyn boldy», - deıdi ol.
Bólim basshysy atap ótkendeı, 2018 jyldyń alǵashqy jartyjyldyǵynda antımonopolııalyq zańnamanyń buzylýyna qatysty 23 tergeý amaldary júrgizilgen. Tergeý nátıjeleri boıynsha atalǵan aralyqta monopolııalyq kiristiń tárkilenýimen birge, salynǵan aıyppuldyń jalpy mólsheri 33 142 503 teńge quraǵan.
