Astanada aqtóbelik músinshi Marat Ǵabdyrahmanovtyń kórmesi ashyldy (FOTO)
ASTANA. QazAqparat - Qazaqstannyń ulttyq murajaıynda qazaqstandyq músinshi, QR Sýretshiler odaǵynyń múshesi Marat Ǵabdyrahmanov jumystarynyń jeke kórmesi ashyldy.
Ekspozıtsııa Qazaq handyǵynyń 550 jyldyǵyna arnalǵan. Oǵan qazaq halqynyń mádenıetin, turmysyn, tarıhyn beıneleıtin sýretshiniń 48 shyǵarmasy qoıylǵan.
Avtor músindik ónerdiń shaǵyn túrleri janrynda qazaq halqy janynyń qylyn shertip, fıosofııalyq oı túıedi. «Búgin kórmede men kórermenderge eń úzdik týyndylarymdy usyndym. Olar laıyqty baǵalanady dep oılaımyn», - dedi vernısajda M.Ǵabdyrahmanov.
M.Ǵabdyrahmanov - respýblıkanyń talantty músinshileriniń biri, ol 26 jasynda arnaıy bilimi bolmasa da Qazaqstan Sýretshiler odaǵynyń múshesi boldy (1996 j.). Úsh jyldan keıin ǵana jas músinshi Q.Jubanov atyndaǵy Aqtóbe memlekettik ýnıversıtetiniń beıneleý óneri bólimin bitirip shyǵady. Shamamen sol kezde ol eki jyldan astam ýaqyt Nıý-Iorktiń «Pratt» óner ınstıtýtynda taǵlymdamadan ótti, al 1998 jyly BUU-da óziniń shyǵarmalary kórmesin uıymdastyrdy.
M.Ǵabdyramanovtyń shyǵarmalary Aqtóbe murajaılarynda ǵana emes, AQSh, Germanııa, Frantsııa jáne Qytaı azamattarynyń jeke kollektsııalarynda saqtalǵan.
Ol Batys Qazaqstan oblysynda ótken «Jazıra Jaıyq - 2011» halyqaralyq kórmesine qatysýshy. Onyń «Kóshpeliler» atty jeke kórmesi Aqtaý jáne Atyraý qalalarynda ótti. 2015 jyly Qazaqstan handyǵynyń 550 jyldyǵyn merekeleý aıasynda Aqtóbede dánekerleý músin óneri boıynsha sımpozıým uıymdastyrdy.
Aqtóbelik músinshiniń Astanadaǵy kórmesi 2016 jylǵy 24 qańtarǵa deıin jalǵasady.
