Astanada AQSh úndisteri men Turandaǵy uly nomadtardyń kóne fotosýretteri bir kórmege toptastyryldy (FOTO)

ASTANA. QazAqparat - Búgin elordada Táýelsizdik saraıynda Ortalyq Azııany mekendegen Uly dalanyń jáne AQSh-tyń keń aýmaǵynda ómir súrgen kóshpeli taıpalardyń arasyndaǵy uqsastyqtarǵa boılaýǵa múmkindik beretin "Týǵan jer" atty fotokórme ashyldy.

"Bul kórme eki túrli qurlyqta jáne ýaqytta túsirilgen eki keshennen turady. Soltústikamerıkalyq fotosýretterdiń jıyntyǵynda 1904 jáne 1929 jyldary tanymal amerıkalyq etnolog Edvard Kertıspen túsirilgen jáne onda AQSh-tyń jergilikti turǵyndary beınelengen. Qazaqtardyń sýretterin Aleksandr Kýn 1868 ben 1871 jyldar aralyǵynda túsirip, alyp qalǵan", - deıdi QR-daǵy AQSh-tyń Ýaqytsha senimdi ókili Djon Ordveı.

Onyń sózine qaraǵanda, fotosýretterdegi birqatar elementter uqsas, sondyqtan eki halyqtyń týystyq jaqyndyǵy, birtektestigi týraly sóz qozǵaýǵa negiz bere alady. "Óte tańqaldyratyn keıbir sýretter bar. Olar óte uqsas. Birinshiden, eki halyq ta kóshpeli ómir saltyn ustanǵan. Qarap tursaq, syrt kelbetteri, dástúrleri men turmysy da bir-birinen aınymaıdy. Bul halyqtarda bir ómirlik qundylyqtar bolǵan. Qazaqtar men soltústikamerıkalyq úndister bir tamyrdan, Altaı óńirinen taraǵan degen teorııa da bar. Ol ras ne ótirigin bilmeımin, degenmen eki qurlyqtaǵy halyqtardyń ómiri týraly oılanýǵa májbúrleıdi", - dep atap ótti ol.

Sharaǵa Qazaqstanda tirkelgen shet memleketterdiń dıplomattary, qoǵamdyq uıymdardyń ókilderi, sonymen qatar kóshpeli halyqtardyń tarıhyn zerttep júrgen mamandar qatysty. Kórme 15 tamyzǵa deıin jalǵasyn tappaq.

"Týǵan jer" jobasyn Astana qalasy ákimdiginiń qoldaýymen QR-daǵy AQSh Elshiligi uıymdastyrdy.