Astanada aqparattyq tehnologııa salasyndaǵy respýblıkalyq forým tuńǵysh ret qazaq tilinde ótip jatyr
ASTANA. 22 jeltoqstan. QazAqparat - Búgin Astanada «Astana ınternet forýmy - 2012» degen taqyryppen tuńǵysh ret qazaq tilinde ótetin aqparattyq tehnologııa salasyndaǵy respýblıkalyq forým óz jumysyn bastady.
Uıymdastyrýshylardyń aıtýynsha, forýmnyń basty maqsaty qazaqstandyq aýdıtorııaǵa arnalǵan aqparattyq tehnologııa salasyn damytyp júrgenderdiń, qazaq tilinde kontent jasaýshylardyń, portal jáne saıt ıeleriniń, aqparattyq tehnologııaǵa jańa ónim usynýshylardyń basyn qosyp, ózara tájirıbe almasa otyryp, ortaq jobalardyń paıda bolýyna yqpal etý. Sondaı-aq, qazaq tildi ınternettiń qoldaný aıasyn damytý, jańa jobalarǵa járdem berý.
QR Bilim jáne ǵylym vıtse-mınıstri Murat Ábenovtiń aıtýynsha, búgingi tańda zamanaýı aqparattyq tehnologııany damytyp júrgen jastarǵa birigip bas qosyp, ıdeıalarymen almasatyn alań aýadaı qajet.
«Máselen, búginde elimizde qazaq tilindegi áleýmettik jeli qurylyp, jumys istep turǵynyn kóp adam bilmeıdi. Keıbir talantty jastar ınternet resýrstarda jańalyqtar ashyp jatyr, olar týraly da ekiniń biri bile bermeıdi. Sondyqtan da osy salada eńbek etip júrgen jastardyń arasyndaǵy baılanysty kúsheıtý qajet», - deıdi ol.
Forýmda aqparattyq qaýipsizdik, bilim salasyndaǵy ınternet, ǵalamtordaǵy aýdarmashy saıttar, qazaq tildi jobalar men ınternet marketıng jáne basqa da taqyryptar talqylanady.
Shara aıasynda ınternetke qatysty jańa jobalar baıqaýy da ótedi. Baıqaýǵa nıet bildirgender forýmda 7 mınýttyq tanystyrylymyn jasaýy kerek. Qatysýshylardyń daýys berý nátıjesinde úsh jeńimpazǵa saıt jasaýda materıaldyq kómek kórsetiledi. Taǵy úsh adamǵa bir jyldyq tegin hostıng beriledi.
Forýmdy «Minber» QQ, "Nur Otan" HDP, «KazakhTimes» jańa tehnologııalar ortalyǵy, Astanadaǵy GeoGebra ınstıtýty birlesip uıymdastyryp otyr. Shara 22-23 jeltoqsan kúnderi ótedi.
