Astanada aqparattyq-kommýnıkatsııalyq tehnologııalar salasyndaǵy qazaq tiliniń damýy talqylandy
ASTANA. 24 qarasha. QazAqparat - Búgin Astanada QR Baılanys jáne aqparat mınıstri Asqar Jumaǵalıevtiń tóraǵalyǵymen «Aqparattyq-kommýnıkatsııalyq tehnologııalar salasyndaǵy qazaq tiliniń damýy» taqyrybynda dóńgelek ústel ótti.
Onda qazaq tilin kompıýterlik, aqparattyq baǵdarlamalar ınterfeısterinde qoldaný máselesi de sóz boldy. Sondaı-aq Baılanys jáne aqparat mınıstrliginiń aqparattyq júıeler men baǵdarlamalyq ónimderdiń ınterfeısterin qazaq tiline aýdarýdy talap etý máselesin qarastyryp jatqany aıtyldy.
Asqar Jumaǵalıevtiń pikirinshe, venderler baǵdarlamalardy ázirleýde jáne aqparattyq júıelerdi qalyptastyrýda olardyń ınterfeısterin qazaq tiline aýdarýlary kerek. Kompanııanyń tehnologııalar salasyndaǵy birden bir jetistigi osyǵan da baılanysty bolmaq. Sonymen qatar dóńgelek ústel barysynda mınıstr mobıldi telefondarda qazaq tili qaripteriniń qoldanylýyna basa nazar aýdardy. Búgingi kúni Samsung, Lg jáne Nokia kompanııalary óz telefondaryna qazaq tili qaripterin engizgen. Sharaǵa qatysýshylar qazaq tilin meńgerip, mmelekettik tilde sóıleýshiler sany kún saıyn artyp kele jatqanyna toqtalyp, sondyqtan da, qazaq tildi qaripter eskerilgen telefondarǵa suranys ta arta túsetinni atap kórsetti. Baılanys jáne aqparat mınıstrligi bul máseleni sheship qoıǵan. Qazirgi kúni memlekettik standarttar jobalary ázirlenip, mobıldi telefondarǵa qazaq tilin engizý fýnktsııalary ornatylýda.
Baılanys jáne aqparat mınıstrliginiń Baılanys jáne aqparattandyrý eomıtetiniń basqarma basshysy Gúlnár Bókeevanyń aıtýynsha ázirlenip jatqan memlekettik standarttarda ár túrli standarttaǵy uıaly baılanys abonentteri stantsııalarynyń negizgi parametrlerine tehnıkalyq talaptar, atap aıtqanda qazaq áripterin kodtaý talaptary jáne olardyń ornalasý rettiligi, habarlamalardy qabyldaý jáne jiberý qoıylýda. Sonymen qatar shara barysynda jaqyn kúnderi Qazaqstanda qazaq áripteri qamtylǵan alǵashqy planshettik kompıýter shyǵaryla bastaıtyny aıtyldy. Jańa qondyrǵyda qazaq tilindegi qujattardy qabyldaý, hattar jiberý sekildi qyzmetter qarastyrylǵan.
Budan bólek dóńgelek ústelde respýblıkalyq jáne aımaqtyq buqaralyq aqparat quraldarynyń redaktorlary qatysqan basqosýda www.baq.kz portaly tanystyryldy. Baq.kz portalyn ázirleýdegi basty maqsat - ınternet jelisinde qazaq tildi BAQ-nyń saıttaryn kóbeıtý jáne barlyq qazaq tildi buqaralyq aqparat quraldaryn bir portalǵa toptastyrý.
Asqar Jumaǵalıevtiń pikirinshe, osyndaı ortalyqtandyrylǵan katalog- qazaq tilindegi aqparattardyń jeli ishinde tez taraýyna yqpal etedi.
Anyqtama: «www.Baq.kz» -qazaq tildi BAQ-nyń saıttary toptastyrylǵan platforma. Ony «Kazkontent»AQ barlyq aqparattyq resýrstardy biriktirý maqsatynda ázirlegen bolatyn. Tilek bildirgen árbir baspasóz aqparat quraly saıttan óziniń bólimshesin asha alady. Saıttyń negizgi maqsaty - qazaq tildi BAQ-nyń reıtıngin kóterý, Internet jelisindegi qazaq tildi kontent sapasyn jaqsartý.
