Astanada Aqmola oblysy aýyl sharýashylyǵy ónimin óndirýshileriniń jármeńkesi ótip jatyr

ASTANA. QazAqparat – Elordada Aqmola oblysynyń aýyl sharýashylyǵy taýarlarynyń jármeńkesi bastaldy, dep habarlaıdy QazAqparat tilshisi.

Aqmola oblysy ákiminiń birinshi orynbasary Malǵajdar Tátkeevtiń aıtýynsha, jármeńke «Astana-Arena» stadıony mańynda 29 jáne 30 qazan kúnderi ótedi.

«Bul jármeńkede óńirdiń aýyl sharýashylyǵy taýaryn óndirýshiler shamamen 650 mln teńgege 850 tonnadan astam túrli ónim ákeldi. Qala turǵyndary men qonaqtary Aqmola oblysy óndirýshileriniń 50-den astam azyq-túlik túrin satyp ala alady», - dedi Malǵajdar Tátkeev tilshilerge bergen suhbatynda.

Onyń aıtýynsha, jármeńkedegi taýarlar baǵasy naryq baǵasynan shamamen 10-15%-ke tómen.

Atap aıtqanda, oblys sharýalary 200 tonnaǵa jýyq et pen et ónimderin, 100 tonna sút pen sút ónimderin, 13 tonna balyq, 1 mln dana jumyrtqa, 25 tonnadan astam un, 100 tonna kókónis, 200 tonna kartop jáne 8 tonnadan astam nan-toqash ónimderin jáne basqa da taýarlar alyp keldi.

Jármeńke alańyna sahna qoıylǵan jáne kelýshilerdiń kóńilin kóterý maqsatynda óńir ónerpazdary kontserttik baǵdarlama usynady.