Astanada Aqmola bekinisin alysqan Buqarbaı batyrdyń atyna kóshe berildi

ASTANA. QazAqparat - Astananyń bir kóshesi endi Buqarbaı Estekbaıulynyń atymen atalady. Búgin osyǵan oraı uıymdastyrylǵan saltanatty sharaǵa zııaly qaýym ókilderi men batyrdyń urpaqtary qatysty, dep habarlady 24.kz.

Arnaıy uıymdastyrylǵan kórme barysynda jurtshylyq nazaryna tarıhı tulǵanyń sýretteri men qarý-jaraqtary usynyldy. Buqarbaı Estekbaıulynyń qazaq tarıhyndaǵy róli erekshe. Ol - Kenesary kóterilisine alǵashqylardyń biri bolyp qatysqan batyr. 1838 jyly tamyzda Aqmola bekinisin alý úshin shaıqasqan. Al 1850 jyly Buqarbaıdyń jasaǵy Qazaly, Aral, Qosqorǵan bekinisterine shabýyl jasap, kazaktar men qoqandyqtardy jeńedi.

Aıta keteıik, batyrdyń esimimen atalatyn kósheler Qyzylorda qalasy men Jalaǵash aýdanynda da bar.

«Bul kisiniń erligi men jan aıamaı kúreskeni úshin ony qalaı qurmettese de jarasady. Aqmola qamalyn bosatýǵa qatysty. Osyny tarıhshylar zerttep, osy kisiniń atyn máńgilikke qaldyraıyq degen ıdeıa halyqtan týǵan», - deıdi zeınetker Birjan Kóshtaev.