Astanada Aqkól balalar úıi tárbıelenýshileriniń sýretteri qoıylǵan «Men tanyǵan álem - jasampaz ómir» atty kórme-jármeńke ashyldy

dep habarlaıdy QazAqparat.

Vernısaj QR Prezıdentiniń «Bolashaq» halyqaralyq stıpendııasynyń stıpendıattary qaýymdastyǵynyń bastamasymen uıymdastyryldy. Qoldaý bildirgender - «Qulanshy» Art ortalyǵy jáne «Statoıl Nors Kaspıen AS» norvegııalyq kompanııasynyń Qazaqstandaǵy fılıaly.

«Bolashaq» Qaýymdastyǵy Keńesiniń tóraǵasy Baýyrjan Baıbektiń aıtýynsha, Qaýymdastyq osydan eki jyl buryn Aqkól balalar úıin óziniń qamqorlyǵyna alǵan.

«Búgingi kúni Qazaqstanda 6 myńǵa jýyq bala tárbıelenip jatqan 50-den astam balalar úıi bar. Memlekettiń qoldaýymen kóptegen jastar «Bolashaq» baǵdarlamasy boıynsha álemniń eń úzdik joǵary oqý oryndarynda bilim alý múmkindigine ıe boldy. Óz kezeginde bolashaqtyqtar ata-ananyń qamqorlyǵynsyz qalǵan balalarǵa jan-jaqty kómek kórsetýi tıis dep bilemin. Búgingi aktsııa kómekke zárý jandarǵa kópshiliktiń nazaryn aýdartý bolyp tabylady. Sebebi elimizdiń árbir azamaty sapaly bilim alýǵa quqyly», - deıdi ol.

Kórme-jármeńkege 14 balanyń 60-tan astam týyndysy qoıyldy. Olardyń baǵasy 6-15 myń teńge aralyǵynda satylýda. B.Baıbektiń sózine qaraǵanda, sýretterdiń birnesheýi satylyp ta úlgerdi. Árbir sýret ózinshe erekshe, olarda balalardyń álemge degen ózindik kózqarastary, ishki dúnıeleriniń tolǵanystary men kóńil-kúıleri jatyr.

Jas sýretshilerdiń jastary 11-17 jas aralyǵynda. Alǵash ótkizilip otyrǵan atalmysh is-sharaǵa olar jiti daıyndalǵan. Belgili qylqalam sheberi Leıla Mahattyń birneshe sheberlik-sabaqtaryn alǵan. L.Mahattyń aıtýynsha, kórmege qatysýshy árbir jas ózinshe talantty. Qazirgi ýaqytta sýretshilerdiń erekshe nazaryna ilikken 17 jastaǵy Edık Fedchenkony Astanadaǵy Óner akademııasyna túsirý máselesi sheshilip jatyr.

Sýretshiniń ózi bolsa, sýret salýmen 4-5 jasynan bastap aınalysqanyn aıtady. Ol kóbine adamdar men tabıǵattyń ásem kezderin qaǵaz betine túsirgendi unatady. Onyń «Teńizdegi kúnniń batýy», «Kún kóziniń sýyq batýy» jáne basqa da, barlyǵy 15-ke jýyq týyndysy bar.

Іs-shara aldaǵy sáýir aıynyń 1-ine deıin jalǵasady.