Astanada ákimniń qatysýymen velojoryq uıymdastyryldy
ASTANA. QazAqparat - Búgin Astanada Konstıtýtsııa kúnine arnalǵan jáne qazaqstandyq velosporttyń ǵasyrlyq mereıtoıy aıasynda Astana qalasynyń ákimi Imanǵalı Tasmaǵambetov, «Týr de Frans-2014» qatysýshysy «Astana» velokomandasynyń kapıany Nıbalı Vınchentsonyń jáne otandyq velokomanda shabandozdarynyń, sondaı-aq velokomandanyń bas menedjeri, Olımpıada chempıony Aleksandr Vınokýrov pen olımpıada chempıony Vladımır Smırnovtyń qatysýymen merekelik velojoryq ótti.
Velojoryq Saltanat saraıy aldyndaǵy alańnan bastalyp, Astana-Arena stadıonynyń aldyndaǵy alańda aıaqtaldy. Joldyń jalpy uzyndyǵy 4600 metrdi qurady. Oǵan 2 200 veloshabandoz qatysty. Márege jetken soń qala basshysy jınalǵan halyqty kele jatqan Konstıtýtsııa kúnimen quttyqtady.
«Konstıtýtsııa kúni qarsańynda biz Astanadaǵy taǵy da bir úlken sporttyq sharaǵa kýá bolyp otyrmyz. Mundaı velojúristi biz Astana kúniniń qarsańynda da ótkizgen bolatynbyz. Osy saıysqa jastardyń kóptep qatysýy - eń aldymen Astana turǵyndarynyń sportqa degen qushtarlyǵyn, qyzyǵýshylyǵyn kórsetedi. Ózderińiz jaqsy bilesizder, Elbasynyń úlken qamqorlyǵynyń, qoldaýynyń arqasynda bizdiń Astanamyz kún sanap ósip-órkendep kele jatyr. Tyń jobalar, oń ózgerister kóz aldymyzda iske asyp jatyr», - dep atap ótti ol.
Ákimniń aıtýynsha, bir ǵana sportqa baılanysty jobalardy alatyn bolsaq, qalamyzda keremet ádemi, záýlim sport keshenderi salynyp jatyr.
«Sonymen qatar, jaqynda Astanada «Velobaık» degen jobany iske asyra bastadyq. «Samuryq-Qazyna» kompanııasymen birlese otyryp, Astana ákimshiligi qalanyń kórikti oryndarynda 40 velostansa ornatty. Bolashaqta olardyń sany 100-ge deıin jetip, velosıpedterdiń sany 1000-nan asady. Munyń ózi qala halqynyń salaýatty ómir saltyn ustanyp, sportqa jaqyn bolýyna septigin tıgizedi degen oıdamyn», - dedi ákim.
Shara barysynda Olımpıada chempıony A. Vınokýrov qala basshysy I. Tasmaǵambetovke «Astana» velokomandasynyń jeıdesin syıǵa tartty. Sondaı-aq, kontserttik baǵdarlama aıasynda eń jas shabandoz, eń egde qatysýshy jáne eń sport súıer otbasy atalymdary boıynsha syılyqtar tapsyrylyp, velojoryqqa qatysýshylardyń arasynda lotereıa oınatyldy.
