Astanada ákimdik apparaty turǵyndarǵa aqparattyq kún ótkizdi
TANA. 22 qazan. QazAqparat /Jasulan Amanbaıuly/ - Astanada Esil aýdany ákiminiń apparaty «Pravo» Qoǵamdyq qorymen birlese otyryp, búgin «Azııa park» saýda ortalyǵynda «Mamandar keńesi» atty aqparattyq kúnin ótkizdi.
«Bul arnaıy halyq úshin jasalyp otyr. Olar eshbir jerde kezekte turmaı-aq, saýda ortalyǵynda júrip ár túrli beıindegi mamandardyń keńesterin ala alady», - deıdi Esil aýdany ákimdiginiń Áleýmettik sala jáne kásipkerlik bóliminiń bas mamany Jamal Ábikenova.
Onyń aıtýynsha, bul shara Esil aýdanynda dástúrli túrde sońǵy 3 jyl qatarynan uıymdastyrylyp keledi. «Biz osy syndy «Áıel jáne quqyq», «Balalar jáne quqyq», «Adam jáne quqyq», «Qarttar jáne quqyq» atty sharalardy, kóshpeli bıýrolardy ótkizdik. Búgingi sharada halyqtyń barlyq tap ókilderine arnap Astana qalasyndaǵy Densaýlyq saqtaý, Jumyspen qamtý jáne áleýmettik baǵdarlamalar, Turǵyn úı, Ádilet basqaramalarynyń mamandary jáne múmkindigi shekteýli azamattardy saýyqtyrý, qoǵamdyq uıym ókilderi men zańger mamandary keńester beredi», - dep atap ótti ol.
Árbir maman kelýshilerdiń esebin jasap, saýaldarǵa taldaý júrgizedi. Qorytyndylary ákim apparatyna joldanady.
«Turǵyndar tarapynan saýaldar ádette zańgerlerge, Turǵyn úı jáne Densaýlyq saqtaý basqarmalaryna qoıylady. Mysaly sońǵy kóshpeli bıýro barysynda 50-den astam adamǵa paıdaly keńester berildi», - dedi J. Ábikenova.
