Astanada ákimder aýyl sharýashylyǵy taýarlaryn óndirýshilerdiń jármeńkesinde boldy
ASTANA. 19 qazan. QazAqparat - Búgin Astana qalasynyń ortalyq alańynda, ıaǵnı qalalyq ákimdiktiń aldyndaǵy jyl saıynǵy aýyl sharýashylyq jármeńkesi ótýde. Atap aıtqanda demalys kúnderi bul jerde Qostanaı jáne Qyzylorda oblystary óz ónimderin usynady.
Ótip jatqan jármeńkeni búgin Astana ákimi Imanǵalı Tasmaǵambetov pen Qyzylorda oblysynyń ákimi Qyrymbek Kósherbaev aralady. Sonymen qatar jármeńkede usynylǵan ónimderdi kórý úshin QR Aýyl sharýashylyǵy mınıstri Asyljan Mamytbekov jáne basqa da laýazymdy tulǵalar keldi. Olar saýdalanyp jatqan taýarlardyń baǵasymen jáne sapasymen tanysty.
Elordanyń resmı saıtynyń málimetine qaraǵanda, jármeńkege Qostanaı oblysynyń 12 aýdany men Qostanaı, Rýdnyı jáne Arkalyq qalalary qatysýda. Qostanaı oblysynan ákelinetin ónimniń jalpy kólemi 300 tonnadan asady, sonyń ishinde 33 tonna et ónimi, 150 tonna kartop pen kókónister, 25 tonna sút ónimi, 20 tonna shujyq ónimderi men jartylaı fabrıkattar, 58 tonna un, jarma, makaron ónimderi, 14 tonna suıyq maı, 100 myń dana jumyrtqa elorda bazarlarynda satylatyn azyq-túlik baǵalarynan tómen baǵamen saýdalanady. Qostanaı oblysynyń 60 kásipkeri 30 shatyrda saýda jasaıdy.
Qyzylorda oblysynan jármeńkege óńirdiń 7 aýdany men Qyzylorda qalasynyń aýyl sharýashylyǵy taýar óndirýshileri qatysýda. Jalpy quny 106 mln. teńgelik 590 tonna ónim satylady. Sonyń ishinde, 8,5 tonna qoı eti, 28,2 tonna sıyr eti, 10,5 tonna jylqy eti, 2 tonna qus eti, 60 tonna balyq, 22 tonna sút taǵamdary,120 tonna kúrish, 82 tonna kartop, 145 tonna kókónis, 9 tonna jemis-jıdek, 45 tonnadan qarbyz ben qaýyn jáne basqa da taýarlar jetkiziledi. Sonymen qatar, jármeńke alańyna 5 kıiz úı tigilip, elorda turǵyndary men qonaqtaryna ulttyq taǵamdar usynylady.
Aıta keteıik, jármeńkede taýarlardyń quny bazardaǵy baǵalardan 10-20% tómen bolady. Budan basqa, halyqtyń satyp alý qabilettiligin arttyrý úshin qalalyq alańda jármeńke kezinde kórkemsýret, jylqy sharýashylyǵy kórmesi, sondaı-aq, Qostanaı jáne Qyzylorda oblystarynyń kórkem ónerpazdarynyń qatysýymen merekelik kontserttik baǵdarlama uıymdastyrylýda.
