Astanada ákeli-balaly Jaıymovtardyń kontserti ótedi
ASTANA. QazAqparat - Búgin Kongress-Holl saraıynda ákeli-balaly óner ıeleri Aıtqalı Jaıymov pen Arman Jaıymnyń shyǵarmashylyq keshi ótedi, dep habarlaıdy QazAqparat tilshisi.
«Bul shara el Táýelsizdiginiń 25 jyldyǵyna arnalǵan. Ulym Arman ekeýmizdiń jazǵan kóptegen mýzykalyq shyǵarmalarymyz bar. Solardyń birqataryn kórermender nazaryna usynýdy jón kórdik»,- deıdi Astana qalasy ákimdigi memlekettik akademııalyq fılarmonııasynyń Qazaq halyq aspaptary orkestriniń kórkemdik jetekshisi ári bas dırıjeri, QR eńbek sińirgen qaıratkeri, professor Aıtqalı Jaıymov.
Osy keshke tanymal óner ıeleri de shaqyrylǵan. Olar qos kompozıtordyń týyndylaryn oryndaıdy.
Atalǵan shyǵarmashylyq kesh «Shattyq Eli» dep atalady. Aıta ketý kerek, respýblıkalyq konkýrstardyń laýreaty, kompozıtor Arman Jaıymnyń kúrdeli mýzykalyq týyndylary elimizde jáne shetel sahnalarynda oryndalyp júr. Búgin ótetin keshte de «Bıbarys» operasynan úzindi sahnalanady, sondaı-aq arııalarǵa, «Tóle bı» kontatasynyń bir bóligine kezek beriledi.
