Astanada ákeli-balaly úsh sýretshiniń kórmesi ashyldy
ASTANA. 5 jeltoqsan. QazAparat - Búgin Astanadaǵy «Arý-Art» qazirgi zaman óner galereıasynda ákeli-balaly belgili sýretshiler Raıymqul, Qýanysh jáne Meıram Esirkeevterdiń «Sýretshiler úshtaǵany» atty sýret kórmesi ashyldy. Kórmege qaraǵandylyq sýretshilerdiń 50-den astam týyndylary qoıylǵan.
Galereıa dırektory Roza Ábenovanyń aıtýynsha, bir otbasynan shyqqan úsh sýretshiniń taqyryptary áralýan, bir-birin qaıtalamaıdy, kerisinshe tolyqtyryp turady.
«Qazaqstan Sýretshiler odaǵynyń Qaraǵandy oblystyq mekemesin qurǵandardyń biri retinde tarıhta qalǵan R. Esirkeevtiń (1921-1980 jj.) qylqalamynan shyqqan týyndylar shynaıylyǵymen óz zamanynyń syryn shertedi. Onyń negizgi taqyryby - adam. Onyń kóptegen portretteri keńes adamynyń, óz jerlesteriniń bet-beınesin aınytpaı qaıtalaıdy», - dep atap ótti ol.
Al úlken uly Qýanysh qylyshynan qan tamǵan Keńes odaǵy kezinde, dálirek aıtsaq ótken ǵasyrdyń 90-jyldarynda «1916 jyl», «Qobyz úni», «Aýyl» atty týyndylarymen qazaq tarıhyndaǵy ujymdastyrý atty qoldan jasalǵan apattyń syryn ashyp, batyl qadam jasaıdy. Sol úshin de kóptegen tepirish kórip, óneri laıyqty baǵalanbaıdy.
Al kishi uly Meıram da elimizge belgili sýretshi, QR Sýretshiler odaǵynyń múshesi. Onyń negizgi taqyryby - tabıǵat. Balqash kólinde balyqshylar brıgadasymen birge jumys istegen kezinde salǵan «Balqash» týraly sýretteri kóldiń kórkin aına-qatesiz qaǵaz betine túsirip, keremet áserge bóleıdi.
Aıta ketý kerek, kórme 2014 jyldyń 15 qańtaryna deıin óner súıer qaýymǵa esigin aıqara ashady.
