Astanada ákeler forýmy ótti
ASTANA. QazAqparat - 13 qazanda Oqýshylar saraıynda Astana ákimdiginiń qoldaýymen ákelerdiń qalalyq forýmy ótti, dep habarlaıdy QazAqparat qala ákimdiginiń medıa ortalyǵyna silteme jasap.
Forýmǵa Parlament depýtattary, qoǵam qaıratkerleri, halyqaralyq jáne úkimettik emes uıymdardyń ókilderi, sondaı-aq, elorda mektepteriniń betke ustar oqýshylary qatysty.
Bıyl shara erkin formatta ótkizilgen bolatyn. Qatysýshylar ózin qyzyqtyrǵan suraqqa birden jaýap aldy.
«Biz ózekti degen birneshe máseleni kóterdik. Bul - óskeleń urpaqqa tárbıe berý problemasymen, ákelerdiń bala tárbıesine qatysýymen, jańa tehnologııalardyń balalardyń damýyna áser etýimen baılanysty suraqtar. Bizdiń basty maqsatymyz - tárbıe salasyndaǵy bilimmen, tájirıbemen bólisý», - dedi forým barysynda sóz sóılegen Astana qalasy bilim berý basqarmasy jetekshisiniń orynbasary Dýlat Jekebaev.
Kezdesý balalardy tárbıeleý isindegi ákelerdiń mártebesi men jaýapkershiligin joǵarylatyp, otbasylyq qundylyqtardyń damýy men nyǵaıýyna septigin tıgizdi. Ákeler odaǵynyń tóraǵasy Qýanysh Jumataevtyń atap ótýinshe, tájirıbe júzinde ótkiziletin mundaı forýmdar ákeler úshinǵana emes, analar úshin de mańyzdy.
«Búgingi kúni bizdiń odaqta 17 belsendi áke bar. Alaıda el boıynsha qatarymyzdaǵy ákelerdiń sany budan birneshe ese artyq. Respýblıkanyń 8 qalasynda bizdiń odaqtyń ókilderi bar. Qazir biz 15 myńǵa tarta adamdy qamtyp otyrmyz. Olar bizdi biledi de, qoldaıdy da», - dedi Qýanysh Jumataev.
Qalalyq ákeler forýmyn bilim berý basqarmasy 2015 jyldan ótkizip keledi. Ony ótkizý jónindegi ıdeıa osydan 5 jyl buryn Astana qalasynyń №59 mektebinde kóterilgen edi.
