Astanada aktsııasy barysynda kóp balaly anaǵa kómek kórsetildi
Qala ákimdiginiń saıtynyń habarlaýynsha, búgin tórt balany tárbıelep otyrǵan kóp balaly anaǵa áleýmettik kómek kórsetildi, balalarynyń biri sal aýrýyna shaldyqqan. Otbasyǵa jyly kıimder, sporttyq kostıýmder, noýtbýk jáne múgedek arbasy tartý etildi.
Kóp balaly ana №2 qalalyq balalar aýrýhanasynda medbıke bolyp jumys isteıdi. Ol úıde bolǵanda múgedektigi bar inilerine aǵalary qaraılaıdy.
«Úlken ulym 23 jasta, ortańǵy balalarymnyń ekeýi de jetinshi synypta oqıdy. Men aýysymda bolǵanda balalarym maǵan kómektesedi, keıde týystarymnan kómek suraımyn. Mine, osylaı ómir súrip jatyrmyz. Áleýmettik qyzmetkerler bizdi tsırkke, kınoǵa, ıppodromǵa shaqyryp jatady qýana baramyz.Al osyndaı úlken kómekti alǵash ret kórsetip otyr, mereke qarsańynda úlken qýanysh. Qamqorlyqtary úshin alǵys aıtamyn», - medbıke.
«Saryarqa aýdany ákiminiń apparaty da «Meıirimdi qala» aktsııasyna qosyldy, az ýaqytta birneshe adamǵa kómek kórsetildi. Búgin biz kóp balaly ananyń úıinde boldyq. Osydan úsh kún buryn munda qala ákimi kelgen, sol kezde áıel tórt balasyna kıim men kompıýter qajet ekenin aıtqan bolatyn. Ananyń ótinishi oryndaldy», - deıdi aýdan ákimi Arman Turlybek.
Qaıyrymdylyq sharasyna «Family Clinic» JShS-y de qýana qosyldy.
«Biz mundaı aktsııalarǵa júıeli túrde qatysamyz, elimizdegi barlyq kásipkerlerdi qaıyrymdy isterge shaqyramyz», - dep málim etti «Family Clinic» JShS dırektory Sholpan Bıhambetova.
Eske salsaq, Táýelsizdiktiń 25 jyldyǵyna oraı memlekettik áleýmettik baǵdarlamalarǵa qosymsha retinde osy aktsııany ótkizý bastamasyn qala ákimi Áset Isekeshev kótergen bolatyn.