Astanada akademık Rymǵalı Nurǵalıge memorıaldyq taqta ornatyldy
ASTANA. QazAqparat - Astanada akademık Rymǵalı Nurǵalıdyń qurmetine memorıaldyq taqta ornatyldy, dep habarlaıdy QazAqparat elorda ákimdigine silteme jasap.
Búgin Astana qalasy ákimdigi men L. Gýmılev atyndaǵy Eýrazııa ulttyq ýnıversıtetiniń uıymdastyrýymen asa kórnekti ádebıettanýshy ǵalym, QR UǴA akademıgi, QR Memlekettik syılyǵynyń ıegeri Rymǵalı Nurǵalı turǵan úıge eskertkish taqta ornatyldy.
Saltanatty sharaǵa qatysqan elorda ákiminiń orynbasary Ermek Amanshaev akademık Rymǵalı Nurǵalıdyń qazaq ádebıetiniń damýyna jáne shákirt tárbıeleýde, Astananyń rýhanııatyna qosqan úlesi týraly aıtyp ótti.
«Men de aǵamyzdyń shákirtimin. Rymǵalı aǵamyzdyń arqasynda ýnıversıtet qabyrǵasynda júrip Maǵjannyń óleńderin, Mirjaqyp pen Ahmet Baıtursynulynyń eńbekterimen tanysa bastadyq. Aǵamyzdyń qazaq ǵylymyna, órkenıetine qosqan úlesi orasan zor. Aǵamyzdyń elordaǵa alǵashqylardyń biri bolyp kóship kelip, osy qalanyń mádenıetine, rýhanııatyna qosqan úlesin atap aıtpaý múmkin emes», - dedi Ermek Amanshaev.
Sonymen qatar, ákim orynbasary akademıktiń jetekshilik etýimen kezinde kandıdattyq dıplomyn qorǵaǵanyn aıtyp ótti.
Rymǵalı Nurǵalı qazaq teatry men dramatýrgııasynyń tarıhy, A. Baıtursynov, M. Jumabaev, J. Aımaýytov, M. Áýezov jáne basqa da qazaq ádebıeti klassıkteriniń shyǵarmashylyǵy týraly irgeli monografııalyq eńbekter jazdy.
«Bul is-sharanyń tálimdik, tanymdyq, tárbıelik máni zor. Aǵamyz ǵylymǵa yntasy bar ár qazaqtyń balasyna qamqor bola bildi. Ádebıettegi eńbegi bir bólek aǵamyzdy teatrtanýshy dep tolyq aıta alamyz. Aǵamyz Almaty tórinen Astanaǵa kelgendegi maqsaty - elordaǵa qazaqı rýhty engizý, onyń tarıhy men dástúrin osy qalaǵa sińirý boldy. Qaladaǵy dańǵyldar men kóshelerge berilgen tamasha ataýlarda da aǵamyzdyń qoltańbasy bar», - dedi Eýrazııa ulttyq ýnıversıtetiniń rektory Erlan Sydyqov.
Sharaǵa sondaı-aq akademık Seıit Qasqabasov, teledramatýrg Sultan Orazalın, R.Nurǵalıdiń shákirtteri, Eýrazııa ulttyq ýnıversıtetiniń ustazdary men stýdentteri qatysty.
