Astanada «AIU 2026 – Elorda júreginde» halyqaralyq jazǵy mektebi máresine jetti
ASTANA. KAZINFORM — Búgin Astanada «AIU 2026 – Elorda júreginde» halyqaralyq jazǵy mektep jobasynyń jabylý rásimi ótti. Osyǵan oraı Astana Halyqaralyq ýnıversıtetinde qorytyndy is-shara uıymdastyryldy.
Іs-shara barysynda álemniń 10-nan astam elinen kelgen stýdentter ulttyq kıim tanystyryp, óz mádenıeti týraly baıandady. Sondaı-aq jobaǵa qatysýshylar men elshilik ókilderi halyqaralyq jazǵy mektep týraly pikir bildirdi. Uıymdastyrýshylar atalǵan bastamany aldaǵy jyldary da jalǵastyrýǵa nıetti ekenin jetkizdi.
Halyqaralyq jazǵy mektep bıyl 5 shildede bastaldy. Jobaǵa Qytaı, Vetnam, Reseı, Germanııa, Italııa, Belarýs, Ózbekstan, Qyrǵyzstan, Kambodja, Nepal jáne ózge de elderden kelgen stýdentter qatysty.
On kúnge josparlanǵan baǵdarlama aıasynda qatysýshylar qazaq tili men ulttyq mádenıetpen tanysyp, asyq atý, arqan tartý jáne toǵyzqumalaq sııaqty ulttyq oıyndardy úırendi. Sonymen qatar Qazaqstan Ulttyq mýzeıine baryp, elimizdiń tarıhı-mádenı murasymen tanysty. Stýdentter kıiz úı mádenıeti men qazaq halqynyń dástúrli turmys-tirshiligi týraly málimet alyp, elordanyń negizgi tarıhı jáne mádenı nysandaryn aralady.
Baǵdarlama sońynda qatysýshylar ulttyq oıyndar boıynsha ózara baq synap, halyqaralyq komandalar quramynda óner kórsetti. Joba sheteldik jastardyń Qazaqstannyń mádenıetimen jaqynyraq tanysýyna jáne túrli elderdiń ókilderi arasyndaǵy mádenı baılanystardy nyǵaıtýǵa múmkindik berdi.
Qytaıdyń Tszıansý provıntsııasyndaǵy Tszıansý Muhıt ýnıversıtetinen kelgen stýdent Tszychen Lıý jobanyń joǵary deńgeıde uıymdastyrylǵanyn atap ótti.
– Halyqaralyq jazǵy mektep jobasy óte jaqsy uıymdastyrylǵan. Osy bastamaǵa atsalysqan barlyq azamattarǵa alǵysymdy bildiremin. Maǵan qazaqtyń dástúrleri men ulttyq oıyndary erekshe unady. Keıbir oıyndarda komandalyq jumystyń mańyzy aıqyn kórinedi. Biz tórt topqa bólinip jarystyq jáne jaqsy nátıjege qol jetkizdik. Ásirese, arqan tartý men asyq atý oıyndary qatty unady, – dedi ol.
Aıta keteıik, jobany Astana Halyqaralyq ýnıversıteti men Qytaıdyń Halyqaralyq bıznes jáne ekonomıka ýnıversıteti janyndaǵy Qazaqstan-Qytaı ekonomıka jáne saýda ınstıtýty birlesip uıymdastyrdy. Sondaı-aq halyqaralyq seriktes joǵary oqý oryndary qoldaý kórsetti.
Buǵan deıin Kazinform agenttigi atalǵan jobanyń ashylý saltanaty týraly habarlaǵan bolatyn.
