Astanada AITV juqtyrǵan onnan astam áıel ómirge deni saý sábı ákeldi
ASTANA. QazAqparat - Astanada AITV (VICh) ınfektsııasyn juqtyrǵan onnan astam áıel ómirge deni saý sábı ákelip, turaqty dıeta men rejımniń arqasynda qalypty ómir súrip jatyr. Bul týraly Astana qalalyq JITS aldyn alý jáne oǵan qarsy kúres ortalyǵynyń bas dárigeri Sábıt Bekmaǵambetov málim etti, dep habarlaıdy QazAqparat tilshisi.
Sábıt Bekmaǵambetovtyń aıtýyna qaraǵanda, qazirgi tańda Astanada AITV juqtyryp, JITS (SPID) aýrýyna shaldyqqandardyń esebinde 989 patsıent tur. Onyń ishinde 63 paıyzy JITS-diń aldyn alý jáne oǵan qarsy kúres ortalyǵynda turaqty túrde antırerovırýsty terapııadan ótip turady.
«Qazirgi tańda elordada AITV juqpasyn juqtyrǵanymen, sap-saý úsh baladan tapqan onǵa tarta áıel bar. Máselen, keshe ǵana teledıdardan kórsetkendeı, AITV juqpasyn juqtyrǵandardyń esebinde turǵanyna 16 jyl bolǵan áıel sap-saý eki bala taýyp, qalypty ómir súrip jatyr. Bul - eń aldymen álgi áıeldiń ýaqtyly em alǵanynyń arqasy ekenin aıta ketý kerek. Dıeta men rejımdi qatań saqtaǵan jaǵdaıda turaqty ómir súrýge bolady. Mine, sondyqtan ómirdiń osyndaı sátterin BAQ arqyly halyqqa jetkizýdiń mańyzy zor», - dedi Sábıt Bekmaǵambetov ortalyqta ótken baspasóz máslıhatynda.
Eske sala ketsek, QR Densaýlyq saqtaý mınıstrligi 2018 jyldyń 15 qarashasy men 15 jeltoqsany aralyǵynda «Óz mártebeńdi bil» úndeýimen Dúnıejúzilik JITS-ke qarsy kúres naýqanyn jarııalady. Astana qalasynyń qoǵamdyq densaýlyq saqtaý basqarmasy men JITS ortalyǵy osy naýqanǵa qosylyp, aldyn ala tekserýden ótýdiń mańyzdy ekenin eskertýde.
