Astanada AITV juqtyrǵan 20-ǵa jýyq naýqas dárigerlerden qashyp júr

Dál osy másele Astananyń JITS-ke qarsy kúres ortalyǵynda qalalyq ishki ister basqarmasy mamandarymen birge talqylandy, dep habarlaıdy QazAqparat.

 

JITS-ke qarsy kúres ortalyǵynyń baspasóz qyzmeti taratqan aqparatqa sáıkes, otyrys barysynda mamandar eki jaqty pikir almasyp, búgingi tańdaǵy AITV máselesine toqtaldy. Dárigerler atalǵan ınfektsııany juqtyrýshylar sany kúnnen-kúnge ósip kele jatqanyn, onyń aldyn alý jolynda kezdesetin qıyndyqtardy atap ótti. Mamandardyń aıtýynsha, AITV-ny juqtyrǵan, biraq mamandar kómegi men keshendi em alýdan bas tartyp, qashyp júrgen naýqastar ózi úshin de, ózgeler úshin de asa qaýipti. Naýqas tıisti dári qabyldap, óz densaýlyǵyn kútpegen jaǵdaıda aýrýy asqynyp, ne bolmasa deni saý adamǵa juqtyrýy ábden múmkin.

«Búginde qalamyzda osyndaı 20-ǵa jýyq naýqas dárigerlerdiń kómeginen bas tartyp, qashyp júrgeni belgili. Ókinishke oraı, olardyń turaqty turatyn baspanasy ne bolmasa turaqty tirkeýi bolmaýy sebepti izdep tabý biz úshin múmkin bolmaı tur. Osy máselede sizderdiń kómekterińizge júginýge týra keledi», - dedi ortalyqtyń epıdemıolog-dárgeri Erik Serikuly ishki ister mamandaryna qarata.

 

Osy oraıda ishki ister basqarmasynyń qyzmetkerleri birlese jumys isteý eki tarapqa da tıimdi bolatyndyǵyn, alaıda qańǵybastardy zań boıynsha ortalyqtarda bir aıdan artyq ustap tura almaıtyndyqtaryn basa aıtty.

«Al sol bir aı ishinde olardy qoǵamǵa beıimdeý de, aýrýynan saýyqtyrý da múmkin emes. Sol sebepti osy máselege baılanysty quzyrly oryndarǵa zańnyń kemshil tustaryna baılanysty usynys aıtyp kelemiz», - dedi qalalyq jergilikti polıtsııa basqarmasy qabyldaý-taratý bóliminiń bastyǵy Murat Beısenbenov.

 

Aıta keteıik, 2017 jyldyń birinshi toqsanynda Astanada AITV ınfektsııasyn juqtyrýdyń jańadan 49 deregi tirkeldi. Bul ótken jyldyń osy kezeńimen salystyrǵanda edáýir kóp deýge bolady. Tirkeýde turǵan naýqastardyń barlyǵy ýaqytyly em qabyldap, dárigerlik keńes alýda.