Astanada AITV-ny juqtyrǵandardyń 17 paıyzyn túrmede jazalaryn óteýshiler quraıdy
ASTANA. 22 aqpan. QazAqparat - Búgin Astanada JITS-tiń aldyn alý jáne onymen kúres jónindegi qalalyq ortalyq pen Qylmystyq-atqarý júıesi departamenti qyzmetkerleriniń vedomstvoaralyq keńesi ótedi.
Keńes penıtentsıarlyq mekemelerde AITV-nyń aldyn alý máselesine arnalatyn bolady.
«Penıtentsıarlyq mekemeler barlyq elderde AITV-men ómir súretinderdiń kóp shoǵyrlanǵan orny bolyp tabylady. Astanada AITV dıagnozymen tirkelgenderdiń 17 paıyzy temir tordyń ar jaǵynda otyr. Sondyqtan, sottalýshylar arasynda aldyn alý sharalaryn júrgizý - AITV-nyń jalpy qoǵamda taralýyna tosqaýyl qoıý joldarynyń biri», - dep atap ótti JITS Ortalyǵynyń baspasóz qyzmetinen.
Keńes barysynda mamandar jabyq oryndarda bul indettiń aldyn alý boıynsha is-áreketterdi odan ári úılestirý jáne sottalýshylar arasynda is-sharalardy qolǵa alý máselelerin talqylady.
