Astanada AITV-ny jańadan 193 adam juqtyrǵan
ASTANA. QazAqparat - Elordada jyl basynan beri AITV (VICh) indetin juqtyrýdyń 193 jaǵdaıy tirkeldi, dep habarlaıdy «QazAqparat» HAA tilshisi.
Búgin Astanada 1 jeltoqsan - Dúnıejúzilik JITS-ke (SPID) qarsy kúres kúnine oraı baspasóz máslıhaty ótti.
Astana qalalyq JITS ortalyǵynyń bas dárigeri Sábıt Ábdiraıymovtyń keltirgen deregine súıensek, álemde jyl saıyn 2 mıllıonǵa jýyq adam AITV juqpasyn juqtyrady. Alǵash anyqtalǵan kúnnen búginge deıin dúnıejúzinde 76 mıllıon adam AITV-ǵa shaldyǵyp, 35 mıllıon adam osy aýrýdan kóz jumdy. Al Astana qalasynda AITV-ny juqtyrǵan alǵashqy adam 1997 jyly tirkelgen. Sodan beri 20 jyl ishinde 1418 adam ınfektsııalanǵan.
«Infektsııany juqtyrýshylardyń deni 15-49 jas aralyǵyndaǵy adamdar. Ókinishke qaraı, sońǵy jyldary jynystyq jolmen juqtyrý sany artyp keledi. Biz buǵan deıin indetti juqtyrǵandar áleýmettik jaǵdaıy tómen ortadan ekenin aıtyp kelsek, qazir jumysy bar, jaǵdaıy jaqsy adamdar da tirkeýde tur. Ortalyǵymyzda tirkelgen naýqastardyń barlyǵy mamandardyń jiti baqylaýynda, ýaqtyly dári-dármekterin qabyldap, arnaıy mamandar olarmen jeke jumys júrgizedi», - dep atap ótti Sábıt Ábdiraıymov.
BUU jáne Dúnıejúzilik densaýlyq saqtaý uıymy JITS-ke qarsy kúres kúnine oraı aktsııa ótkizýde. Astana qalasynyń densaýlyq saqtaý basqarmasy atalmysh kampanııaǵa qosyla otyryp, 10 qarasha men 10 jeltoqsan aralyǵynda AITV/JITS-tyń aldyn alý boıynsha aılyq jarııalady.
«Aılyq sheńberinde qala turǵyndaryn, ásirese jastardy AITV týraly kóbirek bilýge, aldyn alý sharalaryn saqtaýǵa, testileýden ótýge shaqyramyz», - deıdi ortalyqtyń bas dárigeri.
Mekeme málimetine sáıkes, sońǵy jyldary AITV juqpasy bar anadan deni saý náresteler dúnıege kelip jatyr. Іndetti emdeýdegi sońǵy jańalyqtardyń biri - naýqas ARV-terapııany turaqty qabyldap, aǵzadaǵy vırýstyń mólsherin anyqtalmaıtyn deńgeıge deıin tómendetse, onyń jynystyq serigine indet juqpaıdy.
