Astanada AITV men JITS-tiń aldyn alý aılyǵy bastaldy

ASTANA. KAZINFORM — Jyl saıyn 1 jeltoqsanda álemde JITS-pen kúres kúni ótkiziledi, dep habarlaıdy Astana qalasy ákimdiginiń baspasóz qyzmeti.

Bul kúnderi densaýlyq saqtaý, azamattyq qoǵam, túrli vedomstvolar AITV-ınfektsııasynyń taralýynyń aldyn alý boıynsha tıimdi is-qımyl jasaý úshin birigedi. Osy jumys aıasynda elordada atalmysh dert túrleriniń aldyn alý boıynsha «Durys joldy — adam quqyqtarynyń jolyn tańdańyz» aılyǵy bastaldy.

— Osy jyldyń toǵyz aıynda elordada AITV-ınfektsııasynyń 327 jańa jaǵdaıy anyqtaldy. Olar: 75,2 paıyzy — erler, 24,8 paıyzy — áıelder, 62,4 paıyzy — 20-39 jas aralyǵynda, — delingen habarlamada.

Dúnıejúzilik naýqan aıasynda 1 qarashadan 1 jeltoqsanǵa deıin Astanada birqatar is-shara ótkiziledi.

Osylaısha, bir aı ishinde medıtsına qyzmetkerleriniń, azamattyq belsendilerdiń, bilim berý uıymdarynyń, vedomstvolyq organdardyń qatysýymen AITV-ınfektsııasynyń aldyn alý jáne AITV-men ómir súretin adamdarǵa qatysty stıgma men kemsitýshilikke jol bermeý týraly habardarlyqty arttyrý boıynsha túrli is-sharalar ótip jatyr.

Adamdar kóp jınalatyn oryndarda, saýda-oıyn-saýyq ortalyqtarynda, bazarlarda, temirjol vokzaldarynda, áýejaıda, sondaı-aq ózge óńirlerden kelgen qala qonaqtary úshin AITV-ınfektsııasy máseleleri boıynsha mamandardyń konsýltatsııalarymen AITV-ınfektsııasyna jedel testileý ótkiziletin aktsııalar ótedi.

Elordada halyqtyń barlyq toptarynyń AITV-nyń aldyn alý jáne emdeý qyzmetterine sapaly qoljetimdiligin qamtamasyz etý boıynsha túrli sharalar qabyldanyp jatyr.

Osylaısha, medıtsınalyq uıymdarda qyzmet kórsetýmen qatar, halyq ınvazıvti emes ekspress-testerdi qoldana otyryp, AITV-ǵa testileýden ótip, JITS-servıstik úkimettik emes uıymdarda keńes ala alady.

Buǵan deıin habarlaǵanymyzdaı, elordada 9 aıda 300-den astam adam AITV ınfektsııasyn juqtyrǵan.