Astanada AI & Digital Bridge 2026 halyqaralyq IT forýmy ótedi
ASTANA. KAZINFORM - Bıyl 1–3 qazan aralyǵynda elorda Ortalyq Eýrazııadaǵy eń iri tehnologııalyq oqıǵa – AI & Digital Bridge 2026 halyqaralyq forýmynyń alańyna aınalady.
QR Jasandy ıntellekt jáne tsıfrlyq damý mınıstrligi baspaóz qyzmetiniń habarlaýynsha, buryn Digital Bridge ataýymen belgili bolǵan forým jańartylǵan formatta ótkizilip, Qazaqstannyń jasandy ıntellekt pen tsıfrlyq ekonomıkany damytýǵa baǵyttalǵan basymdyqtaryn aıqyn kórsetedi.
AI & Digital Bridge forýmynda jetekshi tehnologııalyq kompanııalar, kásipkerler, ınvestorlar, zertteýshiler jáne memlekettik ınstıtýttardyń ókilderi bir alańda bas qosyp, tsıfrlyq tehnologııalar, jasandy ıntellekt jáne ınnovatsııalyq ekonomıka bolashaǵyn talqylaıdy.
Forýmnyń resmı baǵdarlamasyndaǵy strategııalyq is-sharalardyń biri Jasandy ıntellektini damytý jónindegi keńestiń otyrysybolady. Jıynda eldegi AI ekojúıesin damytý, jasandy ıntellekt salasyndaǵy ulttyq saıasatty iske asyrý jáne jańa tsıfrlyq ekonomıka úshin kadr daıarlaý máseleleri qarastyrylady.
Forým baǵdarlamasynyń dástúrli ári kópshilik asyǵa kútetin bólimderiniń biri – Astana Hub Battle halyqaralyq startap-baıqaýy. Budan bólek jasandy ıntellekt salasyndaǵy jańa esimderdi tanytýǵa yqpal etetin aýqymdy halyqaralyq jarys ótedi. Jas IT-komandalar úshin bul ıdeıalaryn tanystyryp, jobalaryn damytýǵa qoldaý tabýdyń mańyzdy alańy bolmaq.
Búginde AI & Digital Bridge aımaqtyń jetekshi tehnologııalyq oqıǵalarynyń birine aınaldy. Jeti jyl ishinde forýmǵa 100 elden 127 myńnan astam adam qatysyp, 1500-den astam spıker oı qozǵap, 600-den astam startap jahan nazaryna tanystyryldy.
Forým turaqty negizde damyp keledi jáne bıyl da bıýdjet qarajatyn tartpaı uıymdastyrylady.
Uıymdastyrýshylar: QR Jasandy ıntellekt jáne tsıfrlyq damý mınıstrligi, Astana Hub halyqaralyq ınnovatsııalyq klasteri jáne Astana qalasynyń ákimdigi.
Ótetin orny: EXPO halyqaralyq kórme ortalyǵy.
Osyǵan deıin memorgandardyń úzdik jasandy ıntellekt jobalaryna arnalǵan ulttyq syılyq jarııalanǵanyn jazdyq.