Astanada Ahmet Baıtursynulynyń týǵanyna 154 jyl tolýyna oraı erekshe is-shara ótti
ASTANA. KAZINFORM – Astanada Qazaqstan halqynyń tilderi kúnine jáne Ahmet Baıtursynulynyń týǵanyna 154 jyl tolýyna oraı «Ahmet álemi: til, taǵylym, tanym» atty ádebı oı alańy ótti.
— Búgingi ádebı oı alańynyń basty maqsaty — Ahmet Baıtursynulynyń qazaq tili men ádebıetine, aǵartýshylyq baǵytqa qosqan ólsheýsiz eńbegin keńinen nasıhattaý jáne onyń taǵylymdy murasyn qazirgi urpaqqa jetkizý. Ult ustazynyń eńbekteri — tek ótken tarıhtyń enshisindegi qundylyq emes, búgingi bilim berý salasy úshin de mańyzy zor rýhanı mura. Osy rette pedagogtermen birge ǵalymnyń shyǵarmashylyǵyn zerdelep, onyń til tazalyǵy, ulttyq sana, bilim men aǵartýshylyq týraly oılaryn talqylaýdy maqsat ettik. Sonymen qatar Qazaqstan halqynyń tilderi kúni aıasynda ana tilimizge degen qurmetti arttyrý, ulttyq qundylyqtarymyz ben rýhanı muramyzdy dáripteý — barshamyzǵa ortaq mindet. Búgingi «Ahmet álemi: til, taǵylym, tanym» atty ádebı oı alańy osy maqsattardyń toǵysynda ótip otyr. Al «Kitap oqıtyn ult» marafonynyń bastalýy da ustazdar arasynda oqý mádenıetin odan ári damytýǵa serpin beredi, — deıdi mektep dırektory Nurtas Jaǵabaev.
Ádebı oı alańy aıasynda «Kitap oqıtyn ult» marafonyna start berildi. Marafonǵa qatysýshylarǵa arnalǵan «Parasat» klýby ashyldy. Іs-sharaǵa belgili tarıhshy-ǵalym, Ámirjan Álpeıisov, «Órleý» ulttyq ortalyǵynyń Astana qalasy boıynsha Kásibı damý ınstıtýtynyń dırektory Erlan Qalmaqov óz oılarymen bólisti.
Kezdesý barysynda ustazdar Ahmet Baıtursynulynyń ǵylymı jáne shyǵarmashylyq murasy jóninde pikir almasyp, ǵalymnyń ult rýhanııaty men qazaq tiliniń damýyna qosqan úlesine toqtaldy. Іs-shara aıasynda sondaı-aq «Zerdeli ultqa bastar jol» taqyrybyndaǵy «Kitap oqıtyn ult» marafonynyń ashylýy ótti.
Kezdesý sońynda qatysýshylarǵa «Tildi qurmetteý — ultty qurmetteý» degen taǵylymdy oı aıtylyp, ana tilimizdi ardaqtaý ár azamattyń paryzy ekeni atap ótildi.
