Astanada Ahmet Baıtursynulynyń portreti 5 myń shege men jipten jasaldy
ASTANA. KAZINFORM – Astanalyq jas pedagogter Ahmet Baıtursynulynyń 154 jyldyǵyna oraı onyń beınesin zamanaýı ónermen órnektedi. №48 mektep-lıtseıiniń ustazdary String art tehnologııasy arqyly 5 myńǵa jýyq shege men 600 metr jip paıdalanyp, kólemi 3×2 metr bolatyn erekshe portret-ınstallıatsııa jasady.
Ustazdardyń bul eńbegi – ulttyń uly tulǵasyna degen qurmetti zamanaýı ónermen ushtastyrǵan shyǵarmashylyq joba.
Erekshe týyndynyń ıdeıasy mekteptiń jas pedagogterinen shyqqan. Olar Ahmet Baıtursynulynyń esimimen atalǵan bilim ordasynda ult ustazynyń murasyn nasıhattaýdyń ózgeshe jolyn usynǵan. Jobany tolyq aıaqtaýǵa 14 kún ýaqyt ketken.
Jumystyń alǵashqy kezeńinde muǵalimder arnaıy daıyndalǵan taqtaıshaǵa proektordyń kómegimen Ahmet Baıtursynulynyń beınesin túsirip, portrettiń negizgi sulbasyn belgiledi. Keıin taqtaıshaǵa bes myńǵa jýyq shege qaǵyldy. Al odan keıin ár shegege toqylǵan jipterdi bir-birimen baılanystyra otyryp, portrettiń beınesi qalyptastyryldy.
Týyndyny jasaý barysynda jalpy uzyndyǵy 600 metrge jýyq toqyma jibi men 5000-ǵa jýyq shege paıdalanylǵan. Ár jiptiń óz orny men baǵyty muqııat eseptelip, nátıjesinde alystan qaraǵanda tutas portret bolyp kórinetin áserli ınstallıatsııa dúnıege kelgen.
Jobanyń ereksheligi – onyń tek kórkem týyndy ǵana emes, mekteptiń rýhanı-mádenı keńistiginiń bir bóligine aınalýynda. Jas pedagogter daıyn jumysty mektep mýzeıine tartý etti. Endi erekshe portret-ınstallıatsııa bilim ordasyna kelgen oqýshylar men qonaqtarǵa Ahmet Baıtursynulynyń tulǵasyn zamanaýı óner tilimen tanystyratyn kórneki nysan retinde qyzmet etedi.
Ult ustazynyń eńbegin dáripteý – onyń esimin este saqtaýmen ǵana shektelmeıdi. Ahmet Baıtursynulynyń aǵartýshylyq ıdeıalaryn búgingi urpaqqa jańa tásildermen jetkizý de mańyzdy. Osy turǵydan alǵanda, jas pedagogterdiń shyǵarmashylyq bastamasy – tarıh pen zamanaýı tehnologııany sabaqtastyrǵan taǵylymdy joba.
Bir taqtaıshaǵa qaǵylǵan myńdaǵan shege men órilgen júzdegen metr jiptiń artynda – ult ustazyna degen qurmet, izdenis pen ujymdyq eńbektiń nátıjesi tur.
