Astanada Ahmet Baıtursynuly men Maǵjan Jumabaevtyń jınaqtary tanystyryldy
ASTANA. KAZINFORM – QR Ulttyq akademııalyq kitaphanasynda Alash qaıratkerleri Ahmet Baıtursynuly men Maǵjan Jumabaevtyń kóptomdyq akademııalyq shyǵarmalar jınaqtarynyń tusaýkeseri ótti.
Bul jınaqtar Muhtar Áýezov atyndaǵy Ádebıet jáne óner ınstıtýtynyń daıyndaýymen jáne Túrki akademııasynyń qoldaýymen jaryq kórip otyr.
Jıynǵa memleket jáne qoǵam qaıratkerleri, ǵalymdar men dıplomatııalyq mıssııalardyń basshylary men ókilderi jáne depýtattar qatysty. Óz sózinde Túrki akademııasynyń prezıdenti Shahın Mustafaev Ahmet Baıtursynuly men Maǵjan Jumabaevtiń túrki álemi úshin tarıhı ári mádenı mańyzyna toqtaldy.
«Ahmet Baıtursynuly qazaq til biliminiń negizin qalaýshy jáne álipbı reformatory retinde túrki ǵylymynyń damýyna baǵa jetpes úles qosty. Onyń ortaq túrki termınologııasy men ádebı tildi qalyptastyrý týraly ıdeıalary búgingi kúni de ózektiligin joǵaltqan joq. Al Maǵjan Jumabaıuly óziniń shyǵarmashylyǵymen ulttyq sanany oıatyp, túrki áleminiń birligin dáriptegen uly tulǵa boldy. Onyń «Alystaǵy baýyryma» syndy óleńderi baýyrlas halyqtar yntymaǵynyń jarqyn úlgisi sanalady», - dedi akademııa basshysy.
Sonymen birge, Shahın Mustafaev Alash qaıratkerleri kóregendikpen sengen Túrkistan ıdeıasynyń táýelsiz túrki memleketteriniń ıntegratsııasy dáýirinde de óz mańyzyn saqtap otyrǵanyn atap ótti.
Ol bıyl qyrkúıek aıynda qabyldanǵan Ortaq túrki álipbıin Ahmet Baıtursynuly men túrki áleminiń basqa da uly aǵartýshylarynyń asyl murattarynyń oryndalýy retinde baǵalap, Túrki Akademııasynyń mundaı mańyzdy bastamaǵa úles qosqanyn úlken mártebe sanaıtynyn jetkizdi.
Іs-shara barysynda Túrki akademııasynyń túrki áleminiń uly tulǵalarynyń murasyn zertteýge jáne nasıhattaýǵa baǵyttalǵan irgeli jobalary da tanystyryldy.
Akademııanyń «HІH ǵasyr men HH ǵasyrdyń basyndaǵy túrki aǵartýshylyǵy: zııalylardyń ómiri men ıdeıalary» jobasy aıasynda ulttyń órkendeýine qyzmet etken oıshyldardyń ómirbaıandary men ıdeıalary jınaqtalýda. Keler jyly Shoqan Ýálıhanovtyń 190 jyldyǵyna oraı onyń tańdaýly eńbekterin túrik oqyrmandaryna usyný josparlanyp otyr.
Sonymen birge, Túrki akademııasynyń prezıdenti jas urpaqty ortaq qundylyqtardy qurmetteýge tárbıeleý maqsatynda júzege asyrylyp jatqan «Túrki áleminiń tuǵyrly tulǵalary» jobasynyń mańyzdylyǵyn erekshe atap ótti.