Astanada aǵymdaǵy jyldyń qańtar aıynda 900-den astam jańa páter paıdalanýǵa berildi
ASTANA. 14 aqpan. QazAqparat - 2013 jyldyń qańtar aıynda Astanada turǵyn úı qurylysyna jumsalǵan ınvestıtsııa kólemi 2012 jyldyń qańtarymen salystyrǵanda 26,8 paıyzǵa artty. Bul týraly astana.kz saıtyna qalalyq Statıstıka departamentinen málim etti.
Bıylǵy jyly 931 páterlik turǵyn úı paıdalanýǵa berildi. Departamenttiń málimeti boıynsha, paıdalanýǵa berilgen turǵyn úıdiń jalpy kólemi 95 310 sharshy metrdi qurady. Ol 2012 jyldyń qańtarymen salystyrǵanda 32,5 paıyzǵa az. Atalǵan merzimde jeke úı salýshylar jalpy kólemi 5705 sharshy metr úı turǵyzdy. Bul 2012 jyldyń sáıkes merzimi deńgeıimen salystyrǵanda 84,8 paıyzdy quraıdy. Paıdalanýǵa berilgen turǵyn úı kóleminde jeke turǵyn úı salýshylardyń úlesi 6%, al 2012 jyly ol 4,8%-dy quraǵan bolatyn.
«Qurylystyń 1 sharshy metriniń naqty baǵasy 2013 jyldyń qańtar aıynda ortasha alǵanda 96,2 myń teńge boldy. Turǵyn úıdiń paıdaly alańynyń naqty ortasha baǵasy 1 sharshy metrine 129,1 myń teńgeni qurady (2012 jyldyń qańtarynda - 165,0 myń teńge bolatyn)», - delingen habarlamada.
