Astanada AEHA mıssııasy ıadrolyq ınfraqurylymdy baǵalaýdy bastady
ASTANA. KAZINFORM – Astanada Atom energııasy jónindegi halyqaralyq agenttiktiń Qazaqstannyń ıadrolyq ınfraqurylymyna baǵalaý júrgizý jáne INIR keshendi sholýynyń ekinshi kezeńine daıyndalý jónindegi birlesken mıssııasy ótip jatyr.
2026 jylǵy 12–15 qazan aralyǵynda ótetin bul sharaǵa AEHA sarapshylarymen birge QR Atom energııasy jónindegi agenttigi, «Qazaqstandyq atom elektr stantsııalary» JShS jáne «Qazatomónerkásip» UAK» AQ ókilderi qatysýda.
Birlesken jumystyń maqsaty — ózindik baǵalaý esebine qatysty sarapshylardyń usynystaryn talqylaý jáne INIR mıssııasyna daıyndyqtyń keıingi qadamdaryn aıqyndaý. Atalǵan esep AES salý jobasyn iske asyrý úshin qosymsha pysyqtaýdy qajet etetin baǵyttardy anyqtaýǵa múmkindik beredi.
Baǵdarlama aıasynda ınfraqurylymnyń 19 baǵyty talqylanady. Olardyń qatarynda ıadrolyq jáne radıatsııalyq qaýipsizdik, zańnamalyq baza, qarjylandyrý, kadrlyq áleýet, elektr jelileriniń daıyndyǵy men ıadrolyq otyn tsıkli bar.
AEHA-nyń INIR keshendi sholýynyń ekinshi kezeńi atom energetıkasyn damytý týraly sheshim qabyldanǵannan keıingi daıyndyq kezeńin qamtıdy. Bul kezeńde memleket alǵashqy AES jobasyn iske asyrýǵa qajetti jaǵdaılardy qalyptastyryp, qurylysqa daıyndalady.
Osyǵan deıin AES nysandaryn iske qosý merzimi men negizgi jumystar naqtylanǵany týraly jazdyq.
