Astanada AEF-tiń akkredıtteý ortalyǵy ashyldy

ASTANA. QazAqparat - Elordadaǵy eńseli qonaqúılerdiń biri - «Hılton Astanada» XI Astana ekonomıkalyq forýmynyń saltanatty túrde akkredıtteý ortalyǵy ashyldy, dep habarlaıdy QazAqparat tilshisi.

Saltanatty rásimde lentany QR Ulttyq ekonomıka birinshi vıtse-mınıstri Rýslan Dálenov pen «GVA Kazakhstan» seriktesi Bolat Stolıarov ashty.

«Akkredıtatsııany osy jerden, áýejaıdan (Nursultan Nazarbaev áýejaıy - avt.), sonymen birge «Marrıot», «Rıksos» otelderinen alýǵa bolady. Sondaı-aq, ony «Kerýen» saýda, oıyn-saýyq ortalyǵynan ala alasyzdar. Atalmysh oryndardan akkredıtatsııany alý bárine de yńǵaıly bolar degen oıdamyz», - dedi shara barysynda Rýslan Dálenov.

Eske sala ketsek, XI Astana ekonomıkalyq forýmy elordada 17-19 mamyr kúnderi ótedi. QR Ulttyq ekonomıka mınıstri Tımýr Súleımenovtiń aıtýynsha, XI Astana ekonomıkalyq forýmynyń negizgi ereksheligi - bul jolǵy AEF úsh kúnge sozylady. Alǵashqy eki kún boıy qatysýshylar jahandyq máselelerdi talqylaıdy. Al, úshinshi kúni negizgi spıkerler qalyp, kúni boıy alty baǵyt boıynsha Qazaqstan úkimetimen, sondaı-aq sarapshylarmen birge jumys isteıtin bolady.

«Negizgi maqsat - forým kezindegi barlyq ıdeıalardy jazyp alý, bizge laıyqty usynystardy iske asyrý. Biz sonyń bárin qaǵazǵa túsirip, óz elimizde iske asyrýǵa tyrysamyz. Bizge naqty usynystar qajet», - deıdi T.Súleımenov.

Sonymen birge, buǵan deıin AEF-ke qatysatyn spıkerler sany rekordtyq kórsetkishke jetetini habarlanǵan bolatyn.