Astanada «Ádiletti qoǵamǵa — shynshyl sóz» kitaby talqylandy
ASTANA. KAZINFORM — Astanada «Ádiletti qoǵamǵa — shynshyl sóz» atty tańdaýly oı-tolǵaýlar men qanatty sózder jınaǵyn talqylaýǵa arnalǵan jıyn ótti. Qoǵamda keńinen taldanyp, kóziqaraqty qaýym tarapynan joǵary baǵasyn alǵan bul eńbektiń memlekettik basqarý isindegi mańyzy men ulttyq qundylyǵy sarapshylar men zııaly qaýym arasynda jan-jaqty tarazylandy.
QR Ulttyq akademııalyq kitaphanasynda ótken alqaly basqosýǵa memleket jáne qoǵam qaıratkerleri, saıasattanýshylar, sarapshylar, ǵalymdar, shyǵarmashylyq pen bıznes qaýymdastyq ókilderi qatysty.
Jıynda moderatorlyq jasaǵan saıası sarapshy, medıa jáne kommýnıkatsııa mamany Jandar Asan Memleket basshysynyń bul eńbegi qoǵamdyq sanany serpiltýge, azamattyq jaýapkershilikti arttyrýǵa septigin tıgizetindigine toqtaldy.
— Kitaptyń mazmuny elimizdiń basty strategııasyn aıqyndaıtyn bólimderden quralǵan. Aıtalyq, ult sapasy, Zań men Tártip, tsıfrlandyrý jáne jasandy ıntellekt, halyqaralyq saıasat, ulttyq ekonomıka, Taza Qazaqstan taqyryptaryna qatysty Qasym-Jomart Kemelulynyń oı-pikirleri memleketshil tulǵanyń asqaq muratyn aıqyn kórsetedi, — dep atap ótti Jandar Asan.
Onyń aıtýynsha, bul eńbek — tek qanatqaqty oılar jınaǵy ǵana emes, elimizdiń strategııalyq damý baǵdary men azamattyq jaýapkershiliktiń aıqyn kórinisi. Onda kóterilgen qaǵıdattar árbir otandasymyzdyń boıynda zańǵa qurmetti, elge qyzmet etý mádenıetin jáne Otan aldyndaǵy jaýapkershilikti nyǵaıtýǵa baǵyttalǵan.
Jıynda sóz alǵan Qazaqstan Respýblıkasy Quryltaıynyń depýtaty Janarbek Áshimjan bul eńbek basqarý isinde týyndaıtyn túıtkildi máselelerge jaýap berip qana qoımaı, memlekettik reformalardyń logıkasy men eldiń tarıhı damý jolyn tereńirek túsinýge múmkindik beretinin atap ótti.
— Memleket basshysynyń otyz jyldan astam ýaqyttaǵy memleketshildik tájirıbesi men saıası fılosofııasyn biriktiretin bul týyndy qoǵamnyń rýhanı-ıdeologııalyq baǵdarshamyna aınaldy. Memleket basshysynyń júrgizip otyrǵan saıasatyn kópshilikke keńinen jetkizýde qolymyzdaǵy eńbektiń mán-mańyzy aıryqsha. Onda Qasym-Jomart Kemelulynyń memleket aldyndaǵy óz mıssııasy da jan-jaqty taldanyp, júıeli túrde ashyq kórsetilgen. Sondyqtan da, el erteńin oılaǵan barsha oqyrmandy, otanshyl azamattardy osy kitapty oqyp, zerdeleýge shaqyramyn, — dedi Janarbek Áshimjan.
Al L. N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov Prezıdent kitabyndaǵy ustazdar, ǵalymdar men ǵylym, tsıfrlandyrý, jastar saıasaty, ulttyq qundylyqtar jaıyndaǵy negizgi tujyrymdary men paıymdary tóńireginde oı órbitti.
Memleket jáne qoǵam qaıratkeri, belgili jýrnalıst Nurtóre Júsip ult sapasy jáne ádildik qundylyqtary tóńireginde paıymdy pikirin ortaǵa salyp, el Prezıdentiniń júrgizip otyrǵan saıasatyn kópshilikke keńinen jetkizýde bul eńbektiń mán-mańyzy aıryqsha ekenine toqtaldy.
— Jınaqtaǵy eń basty taqyryptardyń biri — ult sapasy jáne ádildik qundylyqtary. Zamana kóshiniń qatal synynda otandastarymyzdyń ádildikti tý etken básekege qabiletti ult retinde damýy Memleket basshysynyń árbir bastamasynan oryn alǵan. Bul jóninde Prezıdentimizdiń: «Biz bilimdi ári bilikti, uqypty jáne jaýapty, isker de eńbekqor jurt bolýymyz qajet» degen pikiri de eńbekte oryn alǵan. Jańa Qazaqstannyń qoǵamdyq dıalog mádenıeti de bul jınaqta keńinen qamtylǵan. Áleýmettik jeliler dáýirinde kez kelgen pikir sanaýly mınýt ishinde kópshilikke taralatyndyqtan, aıtylǵan sózge jaýapkershilik burynǵydan da arta tústi, — dep atap ótti Nurtóre Júsip.
Sondaı-aq jıynda saıası ǵylymdar doktory Qaırat Aıtbaı, qoǵam qaıratkerleri Ǵalıasqar Sarybaev, Baqtııar Ónerbaev, «Túrkistan» respýblıkalyq gazetiniń bas redaktory Baýyrjan Babajanuly, «Astana aqshamy» gazetiniń bas redaktory Erkin Qydyr jáne ózge de qatysýshylar óz oılaryn ortaǵa saldy.
— Memleket basshysy atap ótkendeı, qazir elimizdiń saıası júıesi anaǵurlym ıkemdi ári ashyq bola tústi. Azamattarymyzdyń sana-sezimi, bolmysy ózgerip jatyr. Sonyń arqasynda halqymyzdyń memlekettik ınstıtýttarǵa, zańǵa jáne ádildik pen tártipke degen senimi nyǵaıý ústinde. Bul Memleket basshysy murat etken Ádiletti, Qaýipsiz jáne Órkendegen elge aınalý úderisiniń naqty ómirde júzege asyp kele jatqanyn aıqyndaıdy, — dedi jıyn qatysýshylary.
Eske salaıyq, 5 tamyzda Memleket basshysynyń 1994 jyldan búginge deıingi sóılegen sózderi, baıandamalary men oı-tolǵaýlary qamtylǵan aýqymdy jınaq jaryq kórgen bolatyn. 21 bólimnen turatyn basylymda memlekettik basqarý, zań ústemdigi, tsıfrlandyrý, jastar saıasaty, ekologııa jáne «Taza Qazaqstan» bastamasy sııaqty negizgi taqyryptar qamtylǵan.
