Astanada «Ádebıet portalynyń» tusaýy kesildi
Portal QR Prezıdenti janyndaǵy Ortalyq kommýnıkatsııalar qyzmeti jáne QR Mádenıet jáne aqparat mınıstrliginiń qoldaýymen «Qazkontent» AQ tarapynan ázirlengen joba.
Portaldy tanystyrǵan «Qazkontent» AQ Basqarma tóraǵasynyń orynbasary Nartaı Áshimniń aıtýynsha, portal oqyrmandardyń biregeı kommýnıkatsııalyq platformasyna aınalmaq. Ol tórt tilde: qazaq, orys, aǵylshyn jáne túrik tilderinde qyzmet etedi.
«Portal qoldanýshylardyń qazaq jáne shetel avtorlarynyń shyǵarmalaryn talqylap, olarǵa retsenzııalar men pikirler jazyp, sonymen qatar óz týyndylaryn: suhbat, vıdeo, maqalalar, óleńder, qysqasha mazmun, hat, ıllıýstratsııa jáne aýdarmalaryn ornalastyratyn ádebı onlaın platformasy bolyp sanalady», - dep atap ótti N. Áshim.
Onyń málimetinshe, qazirgi ýaqytta Portalda 1411-den asa kitap, 1184 avtordyń jeke paraqshasy, 87 aýdıokitap, 82 janr túrleri, 68 aqparattyq materıaldar, 51 beıne materıal bar. Sonymen qatar, munda 48 retsenzııa, «Jas avtorlar minberi» aıdarynda 27 avtor ornalastyrylǵan.
Portalda Pdf jáne ePub arnaıy rıder arqyly barlyq kitaptardy jeńil oqýǵa múmkindikter jasalǵan. Rıder oqyrmanǵa mátin tilin, shrıfti, stılin jáne kólemin ózgertip bere alady. Sondaı-aq, kúndizgi, qaraýytqan jáne túngi rejimdik oqý múmkindigi qarastyrylǵan.
