Astanada adam urlap, bopsalaǵan 6 sheteldik sottaldy
ASTANA. KAZINFORM — Elordada adam urlaý isi boıynsha alty sheteldikke qatysty úkim shyqty, dep habarlaıdy Astana qalasy «Saryarqa» aýdanynyń prokýratýrasy.
Prokýratýra Ortalyq Azııa elderiniń biriniń alty azamatyna qatysty adam urlaý jáne óz betinshe bılik etý fakileri boıynsha qylmystyq is boıynsha memlekettik aıyptaýdy qoldady.
Sot barysynda 2024 jylǵy 9 jeltoqsanda top músheleriniń biri kórsetilmegen qyzmet úshin jábirlenýshiden aqsha talap etkeni anyqtaldy. Ol kúsh qoldanyp, jábirlenýshini 80 myń teńge aýdarýǵa májbúrlegen.
Keıin aldyn ala sóz baılasqan top jábirlenýshini kúsh qoldanyp, paıdakúnemdik maqsatta Astana qalasy aýmaǵynda urlap áketken.
Prokýratýra málimetinshe, memlekettik aıyptaýshy sotta sottalýshylardyń kinásin dáleldeıtin jetkilikti aıǵaqtar usynǵan.
— Astana qalasynyń qylmystyq ister jónindegi aýdanaralyq sotynyń úkimimen bes adam aldyn ala sóz baılasý arqyly paıdakúnemdik maqsatta adam urlaǵany úshin 8 jylǵa bas bostandyǵynan aıyryldy. Al toptyń taǵy bir múshesi adam urlaýǵa kómekteskeni jáne óz betinshe bılik etkeni úshin 7 jyl 6 aıǵa sottaldy, — delingen habarlamada.
Prokýratýra adam urlaý qylmysy úshin 15 jylǵa deıin, al óz betinshe bılik etkeni úshin 7 jylǵa deıin bas bostandyǵynan aıyrý jazasy qarastyrylǵanyn eske saldy.
Budan buryn Almatyda polıtsııa qyzmetkerleri adam urlaýǵa oqtalǵan kúdiktilerdi ustaǵanyn jazǵanbyz.
