Astanada adam men jasandy ıntellektiniń arasyndaǵy tepe-teńdikti saqtaýǵa qatysty forým ótedi
Bul halyqaralyq forýmǵa dástúrli túrde Qazaqstan Prezıdenti Qasym-Jomart Toqaev, álemdik kompanııalardyń jetekshileri, IT-ınnovatsııa salasyndaǵy úzdik halyqaralyq jáne otandyq sarapshylar, óńirdiń túkpir-túkpirinen venchýrlyq ınvestorlar qatysady. Digital Bridge 2023 alańynda 20 000+ qatysýshy, 300+ IT kompanııa, 100+ ınvestor men bıznes-perishteler, 250+ spıker jáne álemniń 15+ elinen 100+ startap bas qosady.
«Jasandy ıntellekt zamanaýı qoǵamda mańyzdy ról atqarady, sondyqtan Digital Bridge-2023 tehnologııa men adam áleýeti arasyndaǵy tepe-teńdikti qalaı tabýǵa bolatynyn talqylaıtyn tamasha alańǵa aınalmaq. Bul forým sala mamandary men sarapshylaryna óz bilimimen bólisýge múmkindik beredi. Osy arqyly adamzatqa jasandy ıntellekt qyzmet etetin bolashaqty birlesip qurýǵa jol ashady. Qazaqstan osy baǵytta ınnovatsııalyq ósýdiń joǵary áleýetine ıe bolyp otyr. Qazir elimizde ǵalymdar men jas talanttardyń shoǵyrlanýy úshin qolaıly jaǵdaı jasalyp jatyr. Bizdiń azamattarymyzdyń ártúrli salalarda ázirlegen jasandy ıntellekt ónimderi bar, olar qazirdiń ózinde álem nazaryn aýdaryp otyr. Biz muny sózsiz, maqtan tutamyz. Jasandy ıntellekt ekonomıkany, ónerkásipti, ǵylym men tehnıkany damytýda zor áleýetke ıe», - dep atap ótti Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.
Forýmnyń eki kúndik baǵdarlamasy aýqymdy sharalardy qamtıdy. Memleket basshysynyń qatysýymen ótetin plenarlyq otyrys jáne one-to-one kezdesý, halyqaralyq spıkerlermen 30+ paneldik sessııa, kelisimderge qol qoıý, Hub Battle úzdik IT-startap úshin doda, Google for Startups is-sharalary, Digital Bridge Awards – úzdik startaptarǵa, ınnovatsııalyq jobalarǵa jáne kásipkerlerge beriletin halyqaralyq syılyq, 100 qazaqstandyq jáne sheteldik tehnologııalyq startaptar ózderiniń ınnovatsııalyq sheshimderin usynatyn Startap alleıasy.
Forýmnyń bes jyl qatarynan IT qaýymdastyqtyń erekshe nazaryn aýdaryp, qalyń jurtshylyqtyń qyzyǵýshylyǵyn týdyrǵan eń qyzyqty oqıǵasy – Astana Hub Battle – úzdik IT startaptardyń eń iri dodasy. Bıyl batldyń júlde qory 4 esege ulǵaıdy.
«Bıyl biz Astana Hub Battle kontseptsııasyn sál ózgerttik. Jeńimpazdar úsh nomınatsııa boıynsha marapattalady – Best Social Impact, The Most Innovative, Exponential Growth. Al júlde qory $75 myńǵa deıin artady, ár nomınatsııa boıynsha $25 myń. Qazylar alqasynyń quramynda elimizdiń iri ınvestorlary bolady. Sondyqtan resmı júldeden bólek, perspektıvaly jobalar qazylar alqasynan qosymsha usynystar alýy múmkin», - dedi Astana Hub bas dırektory Maǵjan Mádıev.
Aıta ketý kerek, Astana Hub Battle ekojúıeniń jańa qatysýshylaryn anyqtap, otandyq startap mádenıetin nasıhattaýǵa jáne tehnologııalyq kásipkerlikti damytýǵa baǵyttalǵan. Batlǵa qatysý úshin startaptarda MVP nemese PMF satysynda aýqymdy joba bolýy kerek. Buǵan deıin baıqaýda Kwaaka, NBfit, UvU, Parqour, EasyTap, Kid Security sııaqty startaptar jeńiske jetken edi.
Digital Bridge 2023 aıasyndaǵy Astana Hub Battle-ǵa qatysýǵa ótinimder digitalbridge.kz saıtynda 20 qyrkúıekke deıin qabyldanady.
Aldyn ala baıqaýdan keıin irikteýden ótken básekege qabiletti 100 joba qazylar alqasynyń nazaryna usynylady. Olar forýmnyń birinshi kúni jartylaı fınalda jobalaryn bir mınýttyń ishinde tanystyrý múmkindigine ıe bolady. Bul synaqtan ótken 10 startap fınalda úzdik ataǵy úshin baq synasady.
Forýmnyń hedlaınerleri – IT áleminiń álemge áıgili tulǵalary forým bastalar shaqta jarııalanady. Sonymen qatar dástúrli túrde birqatar kórmeler – korporatsııalar, robototehnıka, IT-mektepter, VC, aımaqtyq IT habtar kórmesi jáne iri IT-kompanııalardyń vakansııalar jármeńkesi ótedi.
Eske salsaq, Digital Bridge halyqaralyq tehnologııalyq forýmy 2018 jyldan beri Astanada jyl saıyn ótkizilip keledi. Digital Bridge uıymdastyrýshylary – Qazaqstan Tsıfrlyq damý, ınnovatsııalar jáne aeroǵarysh ónerkásibi mınıstrligi jáne Astana Hub halyqaralyq tehnoparki.
