Astanada «Adam quqyqtaryn qorǵaýdyń ózekti problemalary» atty arnaıy baıandama tanystyryldy
Jıynǵa qatysqan QR Memleket hatshysy Gúlshara Ábdiqalyqova Adam quqyqtary Qazaqstan memleketi saıasatynyń basym baǵyty, joǵary qundylyǵy ekendigin basa aıtty.
«Arnaıy baıandama adam saýdasy qurbandarynyń quqyqtaryn halyqaralyq standarttarǵa sáıkes qorǵaýdyń naqty joldary, ulttyq zańnamany odan ári jetildirýdiń tetikterin kórsetip otyr. Sol arqyly biz qoǵamdaǵy osyndaı keleńsiz ári qaýipti qubylystardyń jolyn kesýge, adamdardyń ary men abyroıyn, bostandyǵy men quqyǵyn qorǵaýǵa keń múmkindikter jasaımyz. Óıtkeni adam quqyǵy adamzat qoǵamyndaǵy eń qasterli qazyna, baǵa jetpes qundylyq», - dep atap ótti ol.
Onyń aıtýynsha, Búginde BUU múshesi retinde Qazaqstan adam quqyqtaryn qorǵaýǵa, adam saýdasyn boldyrmaýǵa qatysty kúreste eń belsendi jumystar atqaryp júr.
«Ejelden kele jatqan Uly dala demokratııasyna negizdelgen quqyqtyq dástúrler jıyntyǵy, onyń ishinde «Jeti jarǵy» erejesi adamdardyń ómiri men bostandyǵyn qurmetteýge, el basqarýdaǵy úrdisterdi qalyptastyrýǵa qyzmet etip keldi. Osyndaı tarıhı sabaqtastyq Qazaqstan Konstıtýtsııasynda da kórinis tapty. Sondyqtan Ata Zańymyzda kepildik berilgen adam quqyqtary búginde memlekettik saıasattyń basymdyq berilgen eń negizgi baǵyt-baǵdary bolyp sanalady. Táýelsizdik alǵan sátten bastap, Qazaqstan adam quqyqtary men bostandyqtaryn qurmetteýge, saqtaý men qorǵaýǵa mindetteme alyp, BUU-nyń adam quqyǵyna qatysty 60-tan astam halyqaralyq kelisimsharttaryn ratıfıkatsııalaǵanyn aıta ketý kerek», - deıdi G.Ábdiqalyqova.
Atalmysh baıandamany jasaqtaýǵa Qazaqstan Respýblıkasy Prezıdentiniń janyndaǵy Adam quqyqtary jónindegi komıssııasy, sondaı-aq otandyq jáne halyqaralyq qoǵamdyq uıymdar, Ortalyq Azııadaǵy BUU ókildigi, memlekettik organdar jáne qazaqstandyq, sheteldik sarapshylar atsalysty.
