Astanada «Abý-Dabı Plaza» merdigerine iri kólemde aıyppul salyndy
ASTANA. QazAqparat - Astana qalasynyń Tabıǵatty qorǵaý polıtsııasy «Arabtec Consolidated Contractors Limited» kompanııasyn abattandyrý erejesin buzǵany úshin ákimshilik jaýapkershilikke tartty, dep habarlaıdy QazAqparat tilshisi Astana qalasynyń ákimdigine silteme jasap.
«Esil aýdany tabıǵatty qorǵaý polıtsııasynyń qyzmetkerleri aýmaqty tekserý barysynda «Nurly jol» temirjol vokzaly aýdanyndaǵy saıajaı aýmaǵynda «Abý-Dabı Plaza» qurylys nysanynan shyǵarylǵan qurylys qoqystaryn tastaǵan «KAMAZ» markaly avtokóliginiń júrgizýshisin ustady. Ol «qalalar men eldi mekenderdiń aýmaqtaryn abattandyrý qaǵıdalary» erejesin buzǵany úshin 48 100 teńge kólemindegi ákimshilik jaýapkershilikke tartyldy», - dep habarlaıdy qala ákimdigi.
Sol sııaqty kún saıyn qalada tabıǵatty qorǵaý polıtsııasynyń qyzmetkerleri qoqys qaldyqtaryn tógýge jol bermeýge baǵyttalǵan is-sharalar júrgizip, qoqys qaldyqtary kóptep tógiletin jerlerge tekserister júrgiziltini de aıtylǵan.
Odan bólek, turǵyndar arasynda ákimshilik zańnamany buzǵan úshin beriletin jaýapkershilik týraly túsindirý jumystary turaqty túrde júrgizilip keledi.
«Sonymen qatar, baqylaýsyz jáne abattandyrý erejelerin buzýǵa jol bergeni úshin joǵaryda kórsetilgen nysannyń bas merdigeri - «Arabtec Consolidated Contractors Limited» kompanııasy 721 500 teńge kóleminde aıyppul túrinde ákimshilik jaýapkershilikke tartyldy», - delingen habarlamada.
Qala ákimdiginiń habarlaýynsha, jalpy jyl basynan beri QR ÁQBtK-niń 505 babyn «qalalar men eldi mekenderdiń aýmaqtaryn abattandyrý qaǵıdalaryn» buzǵany úshin 236 qurylys uıymy 16 mln teńgeden astam somany quraıtyn ákimshilik jaýapkershilikke tartyldy.
