Astanada «Ábý Dabı Plaza» keshenindegi órt saldarynan 120 jumysshy qaýipsiz jerge shyǵaryldy (FOTO)
ASTANA. QazAqparat - Astanada salynyp jatqan «Ábý-Dabı Plaza» kópsalaly kesheninde shyqqan órt saldarynan qutqarýshylar aldyn ala derekter boıynsha 120 jumysshyny qaýipsiz jerge shyǵardy.
Bul týraly QR ІІM Tótenshe jaǵdaılar komıtetiniń resmı ókili Rýslan Imanqulov habarlady.
«Búgin saǵat 4.40 kezekshi bólimge «Abu Dabi Plaza» keshenindegi órt týraly habar túsken. Habarlama túskennen keıin 10 mınýt ishinde órt sóndirý qyzmeti oqıǵa ornyna jetti. Tórt jaýyngerlik ýchaske quryldy, onyń ekeýi - bul 40 órt sóndirýshi ǵımarattyń ishinde tilsiz jaýmen arpalysyp jatyr. Órt sóndirýshiler aldan ala derekter boıynsha, 120 jumysshyny qaýipsiz jerge shyǵardy. Japa shekkender joq», - dep habarlady R. Imanqulov.
Onyń sózine qaraǵanda, jalynmen kúreske bıik ǵımarattardaǵy órtti sóndirýge arnalǵan tehnıka tartyldy. Barlyǵy otty aýyzdyqtaýǵa 78 órt sóndirýshi men 27 órt sóndirý tehnıkasy jáne Astana qalalyq ІІD 12 tehnıkasy men 24 adamy jumyldyryldy. Órt sóndirýshiler kelgenge deıin 11 qabattan 25 qabatqa deıin órtenip jatty. Oqıǵa ornyna ІІM general-polkovnıgi Q.Qasymov jáne mınıstrdiń orynbasary V. Bojko keldi», - dep atap ótti ol.
«Saǵat 8.25-te ot aýyzdyqtaldy. Podezd joldary bolmaǵandyqtan jalynmen arpalysý qıyn boldy. Aldyn ala málimet boıynsha, órt gaz ballondardyń jarylýynan shyqqan. Jalynnyń shyǵý sebepteri anyqtalyp jatyr. Nysandaǵy órt qaýipsizdigin «NıkaStroıServıs» JShS qamtamasyz etken, - delingen habarlamada.
