Astanada Ábish Kekilbaıulynyń 70 jyldyq mereıtoıyna arnalǵan saltanatty jıyn ótedi
ASTANA. Jeltoqsannyń 4-i. QazAqparat /Aıdyn Báımen/ - Erteń, jeltoqsannyń 5-i kúni (saǵat 15.00) Kúlásh Baıseıitova atyndaǵy Ulttyq opera jáne balet teatrynda memleket jáne qoǵam qaıratkeri, Qazaqstannyń Halyq jazýshysy, QR Parlamenti Senatynyń depýtaty Ábish Kekilbaıulynyń 70 jyldyq mereıtoıyna arnalǵan saltanatty jıyn ótedi,
dep habarlaıdy QazAqparat.
Qazaq ádebıetiniń damýyna ólsheýsiz úles qosqan kemeńger jazýshynyń mereıtoıy qarsańynda ótkeli turǵan óner keshinde qoǵam qaıratkerleri Ábish Kekilbaıulynyń shyǵarmashylyq joly týraly oılaryn ortaǵa salady. Elimizdiń tanymal ánshileri sahnanyń sánin keltirip, án shyrqaıdy.
Ábish Kekilbaıuly 1939 jyly jeltoqsannyń 6-synda Mańǵystaý oblysyndaǵy Ońdy aýylynda dúnıege kelgen. Qazaq memlekettik ýnıversıtetin bitirgen. Eńbek jolyn qazaq tili men ádebıeti pániniń muǵalimi bolyp bastaǵan. 1968-1970 jyldary Otan aldyndaǵy áskerı boryshyn ótegen.
"Qazaq ádebıeti", "Lenınshil jas" gazetterinde eńbek etken. "Qazaqfılm" kınostýdııasynyń kollegııasynyń bas redaktory boldy. 1975 jyldan bastap Qazaqstan Kompartııasy Ortalyq Komıtetiniń ınstrýktory, sektor meńgerýshisi qyzmetin atqardy. 1984-1986 jyldary Mádenıet mınıstriniń orynbasary boldy. 1986-1989 jyldary Qazaqstannyń Jazýshylar odaǵynyń ekinshi hatshysy, Qazaq tarıhı jáne mádenı eskertkishterdiń qorǵaý qoǵamynyń basshysy qyzmetterin atqardy.
1989-1990 jyldary Qazaqstan Kompartııasy Ortalyq Komıtetiniń ultaralyq qatynastary bóliminiń meńgerýshisi boldy. 1992-1993 jyldary - "Egemen Qazaqstan" gazetiniń bas redaktory.
1993-1994 jyldary Qazaqstan Respýblıkasynyń memlekettik keńesshisi boldy. 1994-1995 jyldary Qazaqstan Respýblıkasynyń Joǵarǵy Keńesiniń tóraǵasy qyzmetin atqardy.
1995 jyly - Qazaqstan Respýblıkasynyń memlekettik keńesshisi, 1996 jyly QR Parlamenti Májilisiniń halyqaralyq ister, qorǵanys jáne qaýipsizdik komıtetiniń tóraǵasy boldy. 1996-2002 jyldary - Qazaqstan Respýblıkasynyń Memlekettik hatshysy, 2002 jyldan - Qazaqstan Respýblıkasy Parlamenti Senatynyń depýtaty.
