Astanada Ábilahattyń ánderi shyrqalady
ASTANA. Qazannyń 8-i. QazAqparat - Búgin Astanadaǵy «Kongress-Holl» saraıynda sazger Ábilahat Espaevtyń 85 jyldyǵyna oraı án keshi ótedi.
Án keshine tanymal óner ıeleri qatysyp, sazgerdiń halyq júreginen oryn alǵan ánderi shyrqalady.
Ábilahat Espaev jıyrmasynshy ǵasyrdyń ekinshi jartysynda ulttyq án ónerimizdiń altyn qoryna qundy dúnıeler syılady.
Daryndy sazger Ábilahat Espaev 1925 jyly dúnıege kelip, 1976 jyly Almaty qalasynda qaıtys boldy. 1951-1953 jyldary Almaty konservatorııasynda (qazirgi Qazaqtyń Qurmanǵazy atyndaǵy ulttyq konservatorııasy) joǵary bilim alǵan. Qazaq radıosynda mýzykalyq redaktor bolyp eńbek etken Á. Espaevtyń júreginen nebir mýzykalyq shyǵarmalar ómirge keldi.
Aıta ketý kerek, sazger tek án ǵana emes, romans, hor, ballada janryndaǵy shyǵarmalar da jazǵany belgili. Árbir qazaq ózin tárbıelegen muǵalimine árdaıym sazgerdiń «Ustazym meniń, ustazym» ánin aıtyp, alǵysyn jetkizip keledi.
Á. Espaev sonymen qatar «Qaıdasyńdar, dostarym!», «Áli esimde», «Aq sáýle», «Jaıyq qyzy», «Batyr bala Bolatbek», «Beıbitshilik saqtalady», «Marjan qyz» jáne basqa da osy sekildi tańǵajaıyp ánderimen óz qoltańbasyn qaldyrǵan sazger.
Ábilahat Espaevtyń án keshin Shámshi Qaldaıaqov atyndaǵy halyqaralyq án festıvali dırektsııasynyń bas dırektory, Qazaqstan Jastar odaǵy syılyǵynyń ıegeri, belgili sazger Qaldybek Qurmanáli uıymdastyryp otyr.
