Astanada «Abaıtaný» ortalyǵy ashyldy
ASTANA. 23 aqpan. QazAqparat /Aınur Kenebaeva/ - Búgin Astanadaǵy Qazaqstan-Reseı ýnıversıtetinde «Abaıtaný» ortalyǵynyń ashylý saltanaty boldy.
Igi bastamany júzege asyrýǵa muryndyq bolǵan «Abaıtaný» ortalyǵy jobasynyń jetekshisi - aqyn Almahan Muhamedqalıqyzy. Almahan Muhamedqalıqyzynyń aıtýynsha, ortalyqty Qazaqstan-Reseı ýnıversıtetinde ashýdaǵy kózdelgen maqsat - eki memleket arasynda mádenı kópir salǵan uly tulǵanyń baı murasyn nasıhattaý, jastardy patrıottyq rýhta tárbıeleý jáne qazaq etnografııasyn jańǵyrtý boldy.
«Abaıtaný» ortalyǵy «Abaıdyń ómiri men shyǵarmashylyǵy», «Abaıdyń qaıratkerlik qyzmeti», «Abaıdyń aqyndyq aınalasy», «Abaıdyń kompozıtorlyq aınalasy», «Qazaqtyń dala panoramasy» syndy bólimderdi qamtıdy. Sonyń ishinde Semeı ólkesindegi tarıhı oryndarmen tanystyratyn «Ulylar mekeni» atty fotoshejire de bar.
Sonymen qatar Almahan Muhamedqalıqyzy Abaıtaný ortalyǵynyń murasy Semeıdegi memlekettik Abaı murajaıy qorynan alynǵan fotosýrettermen, abaıtanýshy ǵalymdardyń eńbekterimen jáne Abaıdyń N.Dolgopolovpen birge jınastyrǵan sybyzǵy, asataıaq, shoqpar, soıyl syndy jádigerlermen tolyqtyrylǵandyǵyn aıtty.
Atalmysh sharaǵa Tilderdi damytý basqarmasynyń bastyǵy Orazgúl Asanǵazy men Májilis depýtaty Bekbolat Tileýhan qatysty.
«Abaıdyń ustanymy aqıqatqa degen ińkárlikten týǵan. Abaıdyń nazarynan tys qalǵan birde-bir dúnıe joq. Abaıdy qurmettegendigimiz - qazaqty qurmettegendigimiz, eldiń, jerdiń, halqymyzdyń qadirin bilgendigimiz. Sondyqtan da Qazaqstan-Reseı ýnıversıteti qabyrǵasynda «Abaıtaný» kórme zalynyń ashylýy - túsingen adamǵa eldikke basqan qadam, urpaqqa berer tálim-tárbıeniń bastaýy», - dedi Bekbolat Tileýhan óz sózinde.
