Astanada Abaıdyń týǵan kúnine oraı ádebı-sazdy merekelik is-shara ótedi
Bul kúni Abaı eskertkishine gúl qoıý rásimi bolady. Іs-shara barysynda Astana qalasy memlekettik fılarmonııasynyń ánshisi Perızat Turarova Abaıdyń, Aqylbaıdyń, Ásettiń, Áriptiń ánderin shyrqaıdy. Sonymen qatar, Q. Qýanyshbaev atyndaǵy memlekettik akademııalyq qazaq mýzykalyq drama teatrynyń ártisteri Abaı men Shákárim beınelerin somdaıdy jáne belgili kórkemsóz oqýshy Danııal Sabyrov Abaıdyń qara sózderinen úzindi oqıdy. Belgili aqyn Kákimbek Salyqov uly babanyń rýhanı jan dúnıesin jan-jaqty qyrynan ashatyn maǵynaly oı-pikirlerin ortaǵa salatyn bolady.
Budan basqa, ortalyqtandyrylǵan kitaphanalar júıesi «Abaıdyń murasy - qazaqtyń eń qasıetti qazynasy» atty kitap kórmelerin uıymdastyrady. Kórermenderge syı retinde Abaıdyń danalyq sózderi men óleńderinen, qara sózderinen quralǵan kitapshalar taratylady. Ádebı-sazdy sharanyń basty maqsaty - óskeleń urpaqqa taǵylym retinde Abaıdyń rýhyna taǵzym etý, Abaıdyń rýhanı qundylyqtaryn asha otyryp, uly aqynnyń murasyn jastardyń sanasyna sińirý.
Sonymen qatar, «Abaıdyń rýhanı mektebi» atty ádebı-sazdy is-sharaǵa QR eńbek sińirgen ártisi Kenjeǵalı Myrjyqbaev, QR eńbek sińirgen mádenıet qaıratkeri Serik Ospanov, tanymal dástúrli ánshi Erlan Rysqalı, QR Parlamenti jáne Astana qalasy máslıhatynyń depýtattary, aýdan ákimdikteriniń ókilderi, memlekettik organ, mekemeler men kásiporyn basshylary, zııaly qaýym ókilderi, ardagerler men qarttar, jas aqyndar jáne qyzyǵýshylyq tanytqan barsha elorda turǵyndary men qonaqtary qatysady.