Astanada Abaıdyń 180 jyldyǵyna oraı poezııalyq-mýzykalyq kesh ótti

ASTANA. KAZINFORM – Elordanyń Saryarqa aýdanyna qarasty áleýmettik qyzmet kórsetý ortalyǵynda uly qazaq aqyny, oıshyly jáne aǵartýshysy Abaı Qunanbaıulynyń 180 jyldyǵyna arnalǵan «Abaı jyry – máńgilik mura» atty poezııalyq-mýzykalyq kesh ótti, dep habarlaıdy elorda ákimdiginiń resmı saıty.

Іs-sharaǵa Abaıdyń shyǵarmashylyǵyn joǵary baǵalaıtyn zeınetkerler qatysty. Kesh erekshe kóńil kúıde ótti: egde jastaǵy qatysýshylar aqyn óleńderin oqyp, onyń sózine jazylǵan ánderdi oryndap, Abaı murasynyń óz ómirindegi mańyzdylyǵy týraly oılarymen bólisti.

Uıymdastyrýshylardyń aıtýynsha, keshtiń basty maqsaty – uly aqynnyń rýhanı jáne ádebı murasyn nasıhattaý, sondaı-aq onyń shyǵarmalarynda qamtylǵan qundylyqtardy dáripteý boldy. Sol sııaqty zeınetkerler arasynda dostyq pen mádenı baılanysty nyǵaıtýǵa, olar úshin qolaıly ári qoldaý kórsetetin áleýmettik orta qurýǵa erekshe kóńil bólindi.

Uıymdastyrýshylardyń pikirinshe, mundaı is-sharalar egde jastaǵy adamdardyń qalanyń mádenı ómirine belsendi aralasýyna, ózderin qajet ári eleýli sezinýine múmkindik beredi.

Kesh tek uly oıshylǵa kórsetilgen qurmet qana emes, sonymen qatar jyr, mádenıet pen tarıhqa baǵyttalǵan rýhanı merekege aınaldy.

Buǵan deıin Abaı Qunanbaıulynyń 180 jyldyq mereıtoıyna arnalǵan halyqaralyq, respýblıkalyq jáne óńirlik deńgeıdegi 100-den astam aýqymdy is-sharany qamtıtyn keshendi jospar bekitilgenin jazǵan edik.