Astanada Abaı jáne Qyzylorda oblystarynyń aýylsharýashylyq jármeńkesi ótip jatyr
Astanada óńirlerden kelgen taýar óndirýshilerdiń qatysýymen aýyl sharýashylyǵy jármeńkeleriniń maýsymy ótip jatyr. 28 jáne 29 qyrkúıekte óz ónimderin Abaı jáne Qyzylorda oblystarynyń agrarshylary usynady, dep habarlaıdy elorda ákimdiginiń resmı saıty.
«Elorda turǵyndary men qonaqtaryna Qyzylorda oblysynyń ártisteriniń qatysýymen kontserttik baǵdarlama usynylady. Kelesi jármeńkede Pavlodar, Batys Qazaqstan jáne Almaty oblystary óz ónimderin jetkizedi», – deıdi Astana qalasynyń Investıtsııalar jáne kásipkerlikti damytý basqarmasynyń azyq-túlik qaýipsizdigi bóliminiń bas mamany Nurdáýlet Qosman.
Jármeńkedegi assortıment alýan túrli. Aýyl sharýashylyǵy taýarlaryn óndirýshilerdiń sórelerinde et, kúrish, balyq, kókónister men jemister, ósimdik maıy, sút ónimderi, bal, qymyz, shujyq ónimderi, baqsha daqyldary, as tuzy, sondaı-aq sút jáne kondıterlik ónimder sııaqty ónimder alýǵa bolady.
«Búgin biz Abaı oblysynyń atynan qatysyp otyrmyz. Astanaǵa ekologııalyq taza bal satatyn 6 sharýa qojalyǵy keldi. Biz óz ónimderimizdi tek Qazaqstan boıynsha ǵana emes, shetelge de jetkizemiz. Bizdiń bal – eń taza ári ekologııalyq paıdaly ónim», – dedi fermer Rýslan Hıjın óz ónimderi týraly.
Jalpy, Abaı jáne Qyzylorda oblystarynyń aýyl sharýashylyǵy taýaryn óndirýshiler jármeńkege 400 tonna kúrish, 100 tonna balyq, 100 tonna sıyr jáne jylqy eti, sondaı-aq 30-40 tonnaǵa jýyq bal ákeldi.
«Biz jármeńkelerden únemi azyq-túlik satyp alýǵa tyrysamyz. Ótken aptada Atyraý oblysynyń balyqtaryn satyp alyp, rıza boldyq. Búgin jańa pisken jemister men kókónisterdi satyp aldyq. Meniń oıymsha, baǵalar óte qolaıly. Endi kelesi jármeńkeni kútip otyrmyz», – deıdi elorda turǵyny Sanjar Otaýbaı.
Aıta keteıik, bıyl jármeńke Qarqaraly tas jolyndaǵy «Qazanat» ıppodromyna qarama-qarsy orynda ótedi. Elorda turǵyndary men qonaqtaryna yńǵaıly bolý úshin jármeńkelerdi ótkizý kezeńinde №18, 37, 303 jáne 323 baǵytyndaǵy avtobýs marshrýttary qamtamasyz etiledi.
Jármeńkeler ár demalys kúnderi 27 qazanǵa deıin ótedi.
