Astanada «Abaı oqýlary» baıqaýy bastaldy
ASTANA. Qyrkúıektiń 28-i. QazAqparat /Aıdar Ospanalıev/ - Búgin Astanada Qazaqstan halqy tilderiniń XII respýblıkalyq festıvali aıasynda Qazaqstanda turatyn ózge ult ókilderi arasyndaǵy dástúrli «Abaı oqýlary» respýblıkalyq baıqaýy ótýde.
Elordadaǵy Q.Qýanyshbaev atyndaǵy Qazaq mýzykalyq drama teatrynda uıymdastyrylǵan dástúrli sharaǵa elimizdiń barlyq oblystary men Astana qalasynda uıymdastyrylǵan baıqaýlardyń jeńimpazdary qatysýda.
Sharanyń maqsaty - memleketttik tildiń qoldanys aıasyn keńeıtip, Abaı shyǵarmashylyǵyn nasıhattaý arqyly qazaq mádenıetine, tili men ádebıetine degen ózge ult ókilderiniń de yqylasyn arttyrý bolyp tabylady. Búgingi baıqaýdyń ashylý rásiminde sóz sóılegen Mádenıet mınıstrligi Til komıtetiniń tóraǵasy Baýyrjan Omarovtyń aıtýynsha, baıqaýdyń basty ereksheligi, ol ózge ult ókilderiniń arasynda ótýinde. «Eger uly Abaı sóılegen tilde ózge ult ókilderi de sóılep, onyń shyǵarmashylyǵyn dáriptep jatsa, bul biz úshin jaqsy jetistik. Sebebi bul qazaq halqynyń ulttyq ıgilikteriniń dáriptelip jatqandyǵynyń belgisi», dedi til komıtetiniń tóraǵasy.
Baıqaýdyń erejesi boıynsha oǵan qatysýshy úmitkerler Abaı shyǵarmalaryn nemese qara sózderin jatqa oqý, «Abaı joly» romanynan úzindini jatqa oqý, Abaı ánderin nemese qazaqtyń halyq ánderiniń birin oryndaý sııaqty syndardan súrinbeı ótýleri qajet.
Baıqaý Q.Qýanyshbaev atyndaǵy Qazaq mýzykalyq drama teatry ártisteriniń Muhtar Áýezovtyń «Abaı» pesasyna qoıǵan sahnalyq qoıylymnan bastaldy. Baıqaýdyń jeńimpazdaryn halyq jazýshysy, aqyn, Memlekettik syılyqtyń laýreaty Qadyr Myrza-Álı, Parlament Senatynyń depýtaty Ǵarıfolla Esim, Memlekettik syılyqtyń laýreaty, aqyn Tumanbaı Moldaǵalıev, Ál-Farabı atyndaǵy Qazaq ulttyq ýnıversıtetiniń Fılologııa fakýltetiniń dekany Qanseıit Ábdezuly, L.Gýmılev atyndaǵy Eýrazııa ulttyq ýnıversıtetiniń prorektory, fılologııa ǵylymdarynyń doktory, professor Dıqan Qamzabekuly syndy azamattar anyqtaıtyn bolady.
